Qendra Kulturore Artistike “Mollëkuqet” korr sukses në Festivalin Ndërkombëtar “EuroKids”, Haziri-Nuhiu: Eksperienca si anëtare e jurisë ka thelluar pasionin tim për muzikën

Festivali Ndërkombëtar “EuroKids”, i mbajtur në Salerno të Italisë, mblodhi pjesëmarrës nga vende të ndryshme të botës.

Në këtë event, Qendra Kulturore Artistike “Mollëkuqet”, nën drejtimin e Arta Haziri-Nuhiut, arriti rezultate të jashtëzakonshme duke fituar disa çmime të rëndësishme.

Një nga arritjet kryesore ishte i Aron Nuhiut, i cili zuri vendin e parë në kategorinë e këngës origjinale (Original Song) për grupmoshën e tij.

Ndërkohë, Ilda Nuhiu spikati me dy çmime: vendin e parë në seksionin e filmit (Movie Song) dhe vendin e dytë në kategorinë pop (Pop Song).

Në kategorinë instrumentale (Instrumental/Piano), Dineta Abazi u vlerësua me çmimin e parë për grupmoshën 11-13 vjeçare, ndërsa mori gjithashtu vendin e tretë për këngë origjinale (Original Song) dhe një çmim special “Honourable Mention POP”.

Erina Pasha rrëmbeu vendin e parë për këngë origjinale (Original Song) në grupmoshën 8-10 vjeçare. Po ashtu, Suzi Kolcaku u nderua me çmimin e parë për këngë origjinale në grupmoshën e saj dhe fitoi çmimin special “Honourable Mention POP”.

Malsin Latifi, përveç të tjerëve, arriti të fitojë vendin e dytë në kategorinë pop (Pop Song) për grupmoshën e tij.

Një mirënjohje e veçantë iu dha edhe drejtoreshës, Arta Haziri-Nuhiu, për angazhimin e saj si anëtare e jurisë profesionale të Festivalit “EuroKids”, duke theksuar përkushtimin e saj ndaj artit dhe kulturës.

Ndër të tjera, drejtoresha Arta Haziri-Nuhiu, si anëtare e jurisë në këtë festival, thotë se kjo ishte një eksperiencë e paharruar për të vlerësuar talentët më të mirë nga mbarë bota.

“Të jem pjesë e një paneli kaq të nderuar dhe të kem mundësinë të ndihmoj në njohjen e artistëve të rinj ka qenë një nder i madh”, shkruan ajo, duke iu uruar suksese të mëtejshme të gjithë fëmijeve që ishin pjesëmarrës në këtë festival.

“Urojmë suksese të mëtejshme për të gjithë fëmijët tanë dhe shpresojmë që ky sukses të jetë vetëm fillimi i një karriere të ndritshme”, thotë Haziri-Nuhiu.

Për këtë përvojë, Haziri-Nuhiu thotë se ka pasuruar dukshëm udhëtimin e saj profesional, duke thelluar më tej pasionin e saj për muzikën dhe kulturën ndërkombëtare.

“Shpresoj që ky angazhim të kontribuoni në zhvillimin e mëtejshëm të artit muzikor dhe të inkurajoni një shkëmbim të vazhdueshëm kulturor”, përfundoi ajo. /Telegrafi/