Putini akuzon Ukrainën për shpërthimin e urës në Krime

Presidenti rus Vladimir Putin ka akuzuar Ukrainën për shkaktimin e shpërthimit të fuqishëm që dëmtoi një urë që lidh Rusinë dhe Krimenë, duke e përshkruar shpërthimin si një “akt terrorizmi”.

“Nuk ka dyshim. Ky është një akt terrorizmi që synon të shkatërrojë infrastrukturën civile të rëndësishme”, ka thënë Putin në një video në kanalin Telegram të Kremlinit, shkruajnë mediat e huaja, përcjell Telegrafi.

“Kjo u ideua, u krye dhe u urdhërua nga shërbimet speciale të Ukrainës”, ka shtuar presidenti rus.

Sipas Sky News, ai po takonte Alexander Bastrykin, kreun e Komitetit Hetues të Rusisë, i cili po prezantonte gjetjet e një hetimi mbi shpërthimin dhe zjarrin e së shtunës në urë.

Shpërthimi në urën mbi ngushticën e Kerçit, një rrugë kyçe e furnizimit për forcat e Moskës në Ukrainën jugore, kishte shkaktuar mesazhe entuziazmi nga zyrtarët ukrainas të shtunën, por asnjë pretendim për përgjegjësinë.

Dëmtimi i urës, i cili kishte qenë një simbol imponues i aneksimit të gadishullit të Krimesë nga Rusia, erdhi mes humbjeve të Rusisë në fushën e betejës. /Telegrafi/