Protesta e 11 shkurtit në Tiranë, nis mobilizimi i demokratëve nëpër rrethe

Pas udhëzimit të kreut të Partisë Demokratike, Sali Berisha, deputetët e PD-së në qarqe të ndryshme së bashku me kandidatët për kryetar bashkie kanë nisur takimet me strukturat për mobilizmin e protestës së 11 shkurtit.

Kryefjala e këtyre mbledhjeve është largimi i kryeministrit Edi Rama si dhe nisja e një cikli protestash që do të zhvillohen pas 11 shkurtit.

Në kuadër të udhëzimit të kryedemokratit, deputeti Luan Baçi zhvilloi një takim me kryetarët dhe sekretarët e degëve të qarkut Fier dhe kandidatët për kryetar bashkie, Fier, Lushnje, Mallakastër, Divjakë, Patos, Roskovec, raporton Euronews Albania.

Takime u zhvilluan edhe në Gjirokastër me Kryesinë e degës, drejtues të degëve të PD në Qark, kandidatët për kryetarë të bashkive Gjirokastër, Libohovë, Dropull, Tepelenë, Memaliaj, Përmet e Këlcyrë.

Edhe në Elbasan janë zhvilluar takime me strukturat e PD, ku u bë thirrje për një organizim dhe pjesëmarrje masive në protestën e 11 shkurtit në kryeqytet.

Në Vlorë u zhvillua një takim pune/mbledhje e zgjeruar e Kryesisë së Partisë Demokratike të qytetit, ku të pranishëm ishin Sekretarët Funksional të degës dhe disa prej kryetarëve të Grupseksioneve. Në thelb të mbledhjes ishte organizimi që Partia Demokratike Vlorë do të ketë për Protestën e 11 Shkurtit, si një moment i rëndësishëm politik për demokracinë, pluralizmin dhe votën e lirë, për të gjithë shqiptarët.

Edhe në Kukës, grupi i punës së Degës së Partisë Demokratike në këtë qytet mbajti mbledhjen e radhës ku u diskutua në lidhje me procesin e kontrollit të listave të votuesve, përgatitjen për njoftimin e strukturave ne nivel seksioni dhe grupseksioni për pjesëmarrje në protestën e datës 11.02.2023. Po ashtu u diskutua edhe rreth situatës politike në nivel lokal dhe kombëtar. /Telegrafi/