Prishtina shijon magjinë e gastronomisë dhe kulturës turke!

Nata e mbrëmshme në Prishtina Gastronomy Festival ishte e pasur me aktivitete të shumta dhe plot emocione, duke sjellë kulturën dhe shijet turke në Prishtinë.

Gjatë gjithë natës pati degustim të ushqimeve tradicionale dhe të veçanta turke, falë kuzhinjerëve nga Gaziantep University, me përkrahjen e Yunus Emre Enstitüsü.

Festivali nisi me një panel diskutimi  në kuadër të Prishtina Gastronomy Festival, ku u diskutua tema: “Gastro-Diplomacia: Historia e Suksesit të Gaziantep”.

Paneli solli një perspektivë të re dhe të thelluar mbi rolin e gastronomisë në diplomaci dhe se si Gaziantep ka arritur të ndërtojë një histori suksesi në këtë fushë.

Një nga aktivitetet më të veçanta të natës ishte punëtoria e udhëhequr nga Master-Shefi i njohur turk, Dr. Ceyhun Uçuk.

Në këtë punëtori, Dr. Ceyhun ndau me pjesëmarrësit sekretet e fuzionit të shijeve midis Kosovës dhe Turqisë, duke krijuar një eksperiencë të veçantë për të gjithë të pranishmit. Kjo punëtori ofroi një kombinim të ri të kuzhinës, duke theksuar lidhjet e forta gastronomike midis dy vendeve tona.

Mbrëmja u mbyll me një performancë muzikore nga këngëtarët e njohur Tolga Kazaz dhe Ebru Jilta.

Për të kompletuar këtë përvojë të veçantë, Ansambli Folklorik “GERÇEK” solli një performancë të veçantë, duke bashkuar muzikën dhe vallëzimin tradicional turk dhe krijuar një atmosferë të paharrueshme për të gjithë të pranishmit.

Prishtina Gastronomy Festival, vazhdon të jetë një urë e rëndësishme kulturore që forcon marrëdhëniet midis Kosovës dhe shteteve të tjera mike, të tilla si Turqia.

Mos e humbisni mundësinë për të qenë pjesë e kësaj feste të madhe me shije të shumta që do të zgjasin deri më 9 gusht në sheshin “Adem Jashari”.