S’ka më gjiro, gjetja e vendparkimit në lagjet e Prishtinës do të bëhet përmes sinjalistikës digjitale

Një projekt inovativ që do të transformojë mënyrën se si qytetarët gjejnë vendparkim në lagjet e qytetit në Prishtinë, do të finalizohet shumë shpejt.

Kështu ka bërë të ditur kryeshefi i “Prishtina Parking”, Sokol Havolli përmes një postimi në Facebook.

Sipas tij të gjitha pajisjet teknologjike të vendosura në lagje do të kenë komunikim në kohë reale me sinjalistikën digjitale që do të menaxhohet nga “Prishtina Parking”.

Kjo teknologji e avancuar do të lejojë që informacioni mbi vendet e lira të parkimit të shfaqet në tabela digjitale, duke eliminuar nevojën për të bërë gjiro me automjet në kërkim të një vendi.

“E gjithë teknologjia e vendosur nëpër lagje do të ketë komunikim në kohë reale me sinjalistikën digjitale që do të vendoset nga Prishtina Parking në Kryeqyteti Prishtina. Shumë shpejtë, nuk do të jetë e nevojshme të bëjmë gjiro me automjet në lagje për të gjetur vendparkim sepse informacioni do të shërbehet nga tabelat sikur në foto”, ka shkruar Havolli.

Ai ka shtuar se rreth 25-30% e trafikut në qytetet e madhësisë së Prishtinës shkaktohet nga kërkimi i vendparkimit.

Me këtë sistem të ri, qytetarët do të kenë akses të menjëhershëm në informacionin për vendet e lirë, duke kontribuar kështu në një ambient më të qetë dhe më të organizuar.

Ndërkaq, kryetari i Prishtinës, Përparim Rama ka thënë se po instalojnë teknologji të re nëpër lagjet e Prishtinës që lidhet drejtpërdrejt me sinjalistikën dixhitale të Prishtina Parking.

“Shumë shpejt, nuk do të jetë më e nevojshme të bëjmë xhiro për të gjetur vendparkim. Tabelat digjitale do të tregojnë vendet e lira, siç mund të shihni në foto. Kjo do ta bëjë më të lehtë parkimin dhe do të zvogëlojë trafikun në qytet”, ka shkruar Rama./Telegrafi/