Prishtina fiton ndaj Vllaznisë, ngjitet në pozitën e dytë

Prishtina ka arritur të shënojë fitore ndaj Vllaznisë së Pozharanit me rezultat 2-0.

Prishtina e nisi shumë mirë takimin duke i radhitur rastet një pas një para portës së Jasir Bajramit.

Fillimisht Debatik Curri qëlloi shtyllën nga afërsia në minutën e pestë, ndërsa pas pak minutash Ahmed Januzi shënoi, por goli u anulua për goditje dënimi.

Në minutën e 18-të u akordua penallti nga gjyqtari Fatmir Tahiri, por që u anulua pas konsultimit me anësorin Fatlum Berisha.

Prishtina e gjeti golin në minutën e 27-të. Pasim i bukur i Ergyn Ahmetit për Liridon Fetahajn, që kaloi portierin dhe shënoi për 1-0.

Prishtina kishte dy raste shumë të mira me Januzin, por që nuk arriti të shënojë.

Pjesa e dytë ishte përsëri më e mirë për Prishtinën.

Njëherë Mankenda dhe pastaj edhe Januzi, kishin raste të mira, por që nuk arritën ta ngritin epërsinë.

Prishtina e siguroi fitoren në minutën e 86-të, kur Fetahaj shënoi golin e dytë me kokë, pas asistimit të Bozhovic.

Prishtina pas kësaj fitoreje ka 28 pikë dhe mban vendin e dytë, me dy pikë më pak se Llapi. /Telegrafi/