Presidenti Nauseda do të kërkojë prani të përhershme të trupave amerikane në Lituani

Presidenti i Lituanisë, Gitanas Nauseda tha se do t’i kërkojë Shteteve të Bashkuara të vendosin trupa të përhershme në vend, raportoi Reuters.

SHBA filloi vendosjen e një “force rrotacion” prej rreth 500 trupash në Lituani në vitin 2019 për të ndihmuar NATO-n të pengojë Rusinë nga krahu lindor i aleancës.

Duke folur me gazetarët të mërkurën, Nauseda tha se do të përpiqet të sigurohet që ato forca të vendosen përgjithmonë në Lituani, përcjell Telegrafi.

“Sigurisht që ne do të flasim me SHBA-në për t’u siguruar që forcat rotacionale amerikane do të jenë përgjithmonë në Lituani”, citohet të ketë thënë para gazetarëve, Nauseda, sipas Reuters.

“Ky do të ishte mbështetja më e mirë për sigurinë dhe parandalimin që NATO mund të sigurojë jo vetëm për Lituaninë, por për të gjithë rajonin”, ka vazhduar ai.

Ndryshe, SHBA dhe NATO janë përpjekur të forcojnë krahun lindor pasi Rusia ka grumbulluar mbi 100,000 trupa pranë kufirit të saj me Ukrainën.

Rritja ushtarake e vendit ka ngjallur frikën se Moska mund të planifikojë një inkursion kundër ish-shtetit sovjetik, siç bëri në Çeçeni në vitin 2014.

Megjithatë, Moska ka mohuar synimet për të pushtuar Ukrainën, por nuk ka treguar asnjë shenjë se do të tërhiqte pozicionin e saj ushtarak.

Ndërkohë Shtetet e Bashkuara kanë vënë 8,500 trupa në “gatishmëri të shtuar” për t’u vendosur, shumica e të cilave do të ndihmonin forcën e reagimit të NATO-s – një forcë shumëkombëshe prej rreth 40,000 trupash që mund të vendosen në një njoftim të shkurtër.

Ajo gjithashtu ka vendosur dhe ripozicionuar mbi 3,000 trupa në Rumani, Poloni dhe Gjermani. /Telegrafi/