Portieri i Man Utd, David De Gea flet rreth ekipit të tij të eSports

Portieri i klubit të futbollit Manchester United, David De Gea, së fundmi është bërë pjesë e botës së eSports, duke e krijuar ekipin e tij të quajtur Rebels Gaming.

Rebels Gaming u lansua në nëntorin e vitit të kaluar dhe portieri spanjoll është themeluesi dhe presidenti i organizatës.

Ekipi i eSports i futbollistit do të garojë në tri lojëra të ndryshme të eSports, siç janë League of Legends, Rainbow Six Siege dhe Valorant.

Në një intervistë për revistën e United, Dea Gea foli rreth vendimit për të krijuar një ekip të eSports: “Një vit e gjysmë më parë po flisja me Jose, një nga djemtë që i besoj dhe punoj”.

“Ai e di se unë jam i dashuruar me videolojërat, kështu që ne po flisnim për të krijuar klubin tonë. Kështu filloi. Ne filluam hap pas hapi, ne krijuam Rebels, kështu që ne jemi vërtet krenarë”.

“Ne duam të bëjmë një markë të mirëfilltë, ku njerëzit të pëlqejnë markën dhe sigurisht të përpiqemi t’i vëmë skuadrat në Evropë të garojnë me ekipet më të mira”, u përgjigj De Gea, kur u pyet për qëllimet e tij për ekipin e tij Rebels Gaming. /Telegrafi/