Politikani francez, Louis Boyard është bërë, pas publikimit të një videoje të re, temë e shumë diskutimeve në internet dhe në rrjetet sociale, duke shkaktuar reagime të shumta në opinionin publik francez dhe më gjerë.
Ngjarja ka ndezur debate jo vetëm për sjelljen e tij, por edhe për perceptimin e politikanëve të rinj ndaj pasurisë dhe luksit.
Në videon që qarkullon gjerësisht, Boyard shihet duke hequr orën nga kyçi i dorës pak para se të hyjë në një intervistë televizive për kanalin BFM TV, ku ai kishte për qëllim të fliste në mënyrë kritike ndaj “super të pasurve” dhe pabarazive ekonomike në Francë.
Pikërisht ky kontrast – ndërmjet mesazhit të tij kundër luksit dhe veprimit të tij për të fshehur një objekt luksoz – ka bërë që shumë ta akuzojnë për hipokrizi.
Sipas komenteve të shumta në rrjetet sociale, ora që ai mbante besohet të ishte e markës Rolex, me një vlerë të përafërt prej 50 mijë dollarësh.
Kjo ka shtuar dyshimet se Boyard, pavarësisht retorikës së tij kundër elitave financiare, vetë nuk është imun ndaj joshjes së luksit. Pamjet janë regjistruar brenda ndërtesës së Asamblesë Kombëtare Franceze, dhe kamerat televizive kanë fiksuar momentin kur ai e heq orën dhe e vendos në xhep, vetëm pak çaste para fillimit të intervistës.
Në rrjetet sociale, përdorues të shumtë kanë reaguar me kritika, duke shkruar se politikani është “kapur në flagrancë” dhe se ky gjest tregon mungesë sinqeriteti. Disa e kanë cilësuar incidentin si shembull tipik të hipokrizisë politike, ndërsa të tjerë kanë mbrojtur Boyard-in duke thënë se reagimet janë të ekzagjeruar dhe se videoja është nxjerrë jashtë kontekstit.
Vetë Louis Boyard ka reaguar menjëherë përmes një postimi publik, duke mohuar të gjitha pretendimet. Ai ka sqaruar se ora që mbante nuk është Rolex, por një Tissot me vlerë rreth 295 euro, dhe se zakonisht e heq gjatë intervistave për arsye praktike, pasi ka zakon të luajë shumë me duar kur flet. Boyard shtoi gjithashtu se i vjen keq që një detaj i tillë po e zhvendos vëmendjen nga çështjet e rëndësishme për të cilat ai mundohet të flasë, si pabarazia sociale dhe drejtësia ekonomike.
Ngjarja ka hapur një debat më të gjerë në Francë mbi imazhin publik të politikanëve dhe mënyrën se si detajet e vogla, si veshja apo aksesorët, mund të ndikojnë në perceptimin e publikut për sinqeritetin dhe besueshmërinë e tyre. /Telegrafi/
