Policia tregon se çfarë gjeti në vendin ku ndodhi grabitja e armatosur në Mitrovicë, ku i vdekur mbeti një 58 vjeçar

Mbrëmë rreth orës 22:24, të datës 28 dhjetor 2021, policia në Mitrovicë ka pranuar informacion për të shtëna me arme zjarri në rrugën ‘Mbretëresha Teutë’ në Mitrovicë.

Policia përmes një njoftimi ka bërë të ditur se me të pranuar informacionin në vendin e ngjarjes me urgjencë kanë dalë  të gjitha njësitet e nevojshme policore.

“Nga informacionet e para nga vendi i ngjarjes, bëhet e ditur se si pasojë e të shtënave nga ana e dy të dyshuarve i plagosur në dyqanin e tij kishte mbetur viktima/mashkull kosovar, të cilin me urgjencë e kanë dërguar në Spitalin Rajonal në Mitrovicë. Ndërkohë, nga autoritetet spitalore është raportuar se i plagosuri, viktima A. M., 58 vjeçar, si pasojë e plagëve kishte vdekur. Trupi i pajetë i viktimës është dërguar për obduksion në IML”, thuhet në njoftim.

Lexo po ashtu Grabitja e armatosur në Mitrovicë që përfundoi me vrasje

Lidhur me rastin janë ndërmarrë veprime të shpejta policore, në vendin e ngjarjes është gjetur një predhë dhe dy gëzhoja, ndërsa për një kohë të shkurtër janë identifikuar dhe arrestuar dy persona të dyshuar, si dhe janë sekuestruar një armë pistoletë, dorëza, një thikë dhe dëshmi tjera që ndërlidhen me veprën penale.

“Mbi bazën e veprimeve hetimore dhe provave të siguruara, dyshimet janë ngritur se dy të dyshuarit të maskuar dhe nën kërcënimin e armës kanë hyrë në dyqanin e viktimës ku gjatë ballafaqimit me viktimën, njëri prej të dyshuarve ka shtënë dhe ka plagosur viktimën me pasojë vdekjeprurëse.

Pas intervistimit me aktvendim të prokurorit të rastit dy të dyshuarve M. H.,30 vjeçar dhe G. R., 19 vjeçar, u është caktuar masa e ndalimit policor”, thuhet në njoftim.

Në bazë të ekzaminimit të provave materiale, dy të arrestuarit dyshohen se kanë kryer edhe grabitjen e raportuar më 27 dhjetor 2021, ku cak i grabitjes ishte një barnatore.

Policia falënderon qytetarët për bashkëpunimin dhe kontributin e tyre që të identifikohet drejtimi i ikjes së të dyshuarve dhe kjo ka rezultuar me arrestimin e shpejtë të tyre. /Telegrafi/