Policia në Ferizaj shqipton një mijë e 182 gjoba dhe pezullon 17 patentë shofer

Me qëllim të parandalimit të aksidenteve në komunikacion, Policia Rajonale në Ferizaj ka ndërmarrë një sërë aktivitetesh. Vetëm gjatë javës së kaluar, janë shqiptuar gjithsejtë një mijë e 182 gjoba kundërvajtëse si dhe janë pezulluar gjithsejtë 17 patentë-shoferë për drejtuesit e mjeteve që kanë kryer shkelje të rënda në trafik.

Kanun Veseli, zëdhënës i Policisë për Rajonin e Ferizajt, nëpërmjet një njoftimi ka sqaruar se gjatë javës së kaluar janë regjistruar gjithsej 25 aksidente, nga të cilat: 7 aksidente me lëndime, ku kanë mbetur të lënduar 13 persona, ndërkaq 18 aksidente me dëme material.

“Policia Rajonale e Ferizajt do të vazhdojë me aktivitete të shtuara për të parandaluar aksidentet dhe apelon tek të gjithë drejtuesit e automjeteve që të jenë të kujdesshëm dhe të respektojnë rregullat e trafikut. Ftojmë qytetarët që të bashkëpunojnë me Policinë dhe të raportojnë çdo kundërvajtje në trafik përmes stacionit më të afërt policor, përmes aplikacionit digjital “Lajmëro Policinë” dhe në numrat e urgjencës: 192, 0290/326-250 & 0290/322-406. Të dhënat e raportuara do të trajtohen me konfidencialitet të plotë”, ka thenë Veseli./Telegrafi/