Policia italiane ndalon shitjen e një modeli nga Fiat për shkak të flamurit të Italisë të vendosur në të

Më herët flitej se si crossoveri më i vogël i Alfa Romeos supozohej të quhej Milano.

Bëhet e ditur se ai u riemërua Junior pasi autoritetet italiane nuk ishin të emocionuar nga emri origjinal.

Madje, një ligj vendas e bllokoi Stellantis nga përdorimi i një emri italian në një automjet të prodhuar jashtë vendit.

Epo, diçka e ngjashme po ndodh përsëri, përcjell Telegrafi.

Një tjetër markë nga Stellantis, Fiat, po ka probleme me shitjen e Topolinos për shkak të flamurit italian të vendosur në të.

Siç raportohet, 134 Topolinos janë sekuestruar nga policia italiane në qytetin e Livornos.

Fajtori? Flamuri anësor i vendosur pranë dorezës së derës nuk duhet të jetë aty e as në ndonjë vend tjetër.

Kjo pasi EV i vogël nuk prodhohet në Itali por në fabrikën Kenitra të Marokut.

Ligji që ndalon Fiat-in të përdorë flamurin italian në një produkt të prodhuar diku tjetër daton nga dhjetori i vitit 2023.

Ai që e shkel ligjin dënohet me gjobë administrative nga 10 mijë në 250 mijë euro.

Stellantis thuhet se nuk ka rrugë tjetër veçse të heqë flamurin për të shitur ato makina të sekuestruara Topolino. /Telegrafi/