Policia fillon hetimin e vdekjes së  43-vjeçarit nga Kaçaniku që u gjet të hënën, pasi rezultonte i zhdukur nga qershori

Policia e Kosovës ka filluar hetimet mbi vdekjen e Muhabi Islami nga Begraca e Kaçanikut, i cili u gjet të hënën pasi rezultonte i zhdukur tash e rreth 5 muaj.

Sipas komunikatës për medie, trupi i pajetë është dërguar në Institutin e Mjekësisë Ligjore në Prishtinë për obduksion.

“Stacioni Policor në Kaçanik nga Drejtoria Rajonale e Policisë në Ferizaj, dje rreth orës 17:30 ka pranuar një informacion nga një qytetar, se në malet e fshatit Begracë të Kaçanikut, saktësisht tek vendi i quajtur ’’Lagjja e Qorupëve’’, ka hasur një trup njeriu i pajetë, i dekompozuar. Policia e Kaçanikut dhe më pas hetuesit nga Sektori Rajonal i Hetimeve nga Drejtoria Rajonale e Policisë në Ferizaj , menjëherë kanë dalur në vendin ku është gjetur trupi i pajetë i dekompozuar dhe ka nisur hetimet”, thuhet në komunikatë.

Lexo po ashtu Gjendet i vdekur 41-vjeçari nga Kaçaniku që ishte zhdukur rreth pesë muaj më parë

Nga hetimet e para, siç thuhet në komunikatë dyshohet të jetë trupi i pajetë i personit të zhdukur M.I (M/K) i moshës 43 vjeçar, i cili ishte në kërkim që nga data 07.06.2021.

“Me vendim të Prokurorit të Prokurorisë Themelore në Ferizaj, rasti është cilësuar ‘’Hetim mbi vdekjen’’ dhe trupi i pajetë dërgohet në Institutin e Mjekësisë Ligjore në Prishtinë për obduksion. Policia, në koordimin edhe me Prokurorinë Themelore në Ferizaj, po vazhdon hetimet, duke grumbulluar dëshmi materiale dhe deklarative në lidhje me këtë rast dhe për informacione tjera deri në identifikimin e plotë të trupit të pajetë, do të njoftoheni me kohë”, thuhet në komunikatë. /Telegrafi/