Pochettino: E kam ëndërr ta drejtoj Realin, Argjentinën apo rikthimin te Espanyoli

Mauricio Pochettino ka përmendur tri skuadrat që dëshiron t’i drejtojë kur të ndodhë largimi nga Tottenham Hotspuri në një të ardhme të afërt.

Trajneri argjentinas ka dhënë një intervistë për Catalunya Radio, duke thënë se ëndërron ta marrë drejtimin e Real Madridit, përfaqësueses së Argjentinës apo edhe të rikthehet te Espanyoli.

47-vjeçari ka disa sezone që lidhet me një kalim te Los Blancos, mirëpo ka bërë të ditur se ai do ta respektojë kontratën me Spurs.

“Unë i kam dhënë fjalën Tottenhamit se do ta rinovoj kontratën. Natyrisht, është një ëndërr të drejtoj klube si Real Madridi, të shkoj te kombëtarja e Argjentinës apo të rikthehem te Espanyoli një ditë”, ka thënë argjentinasi.

Lexo po ashtu Të gjitha lajmet nga Mauricio Pochettino

“Por, aktualisht nuk e kam konsideruar largimin nga Tottenhami, jam i lumtur aty dhe dua të punoj për sukseset e skuadrës”, ka shtuar më tej ai.

Pochettino në sezonin që lamë pas e kualifikoi skuadrën angleze në finale të Ligës së Kampionëve, pasi i eliminoi skuadrat si Borussia Dortmund, Manchester City dhe Ajax, por në finale ishin të pafat ndaj Liverpoolit. /Telegrafi/