Petrovska – Gjyler: Bashkëpunimi i Maqedonisë dhe i Turqisë në Mbrojtje vazhdon të zhvillohet

Ministrja e Mbrojtjes Sllavjanka Petrovska sot në Stamboll u takua me homologun e saj turk, ministrin e Mbrojtjes Nacionale Jashar Gjyler, me të cilin bisedoi për marrëdhëniet e Maqedonisë dhe Turqisë në Mbrojtje, sigurinë në Ballkan dhe përforcimin e sigurisë kolektive të Aleancës.

“Bashkëpunimi i deritanishëm thuajse prej tri dekadave midis Maqedonisë së Veriut dhe Turqisë na mundësoi të kemi një Armatë më të mirë, më të pajisur dhe më të fuqishme. Maqedonia e Veriut është e bindur në standardet më të larta të industrisë së Mbrojtjes turke, ndërsa dëshmi për këtë është edhe furnizimi i sistemeve të reja artilerike për Armatën nga kompani turke me renome. Këto sisteme artilerike do ta përforcojnë sigurinë tonë kolektive në Aleancë”, tha ministrja në takim.

Petrovska u përqendrua edhe në mbështetjen turke në pajisjen dhe modernizimin e Armatës, që deri më tani është rreth 30 milionë dollarë. Në pajtim me bashkëpunimin ushtarako-financiar me Turqinë, janë furnizuar lloje të ndryshme të automjeteve, duke përfshirë edhe një tren për tërheqje për nevojat e Armatës, lloje të ndryshme të pajisjeve dhe pjesë rezerve, si edhe armatim dhe municion personal.

Ministri Gjyler potencoi se Turqia e vlerëson lartë bashkëpunimin me Maqedoninë e Veriut në fushën e mbrojtjes dhe porositi se vendi mbetet i përkushtuar në mbështetjen në zhvillimin e kapaciteteve të Armatës së Republikës së Maqedonisë së Veriut si Armatë e një vendi mik dhe vendi – aleat.

Siç thotë Ministria e Mbrojtjes, të dyja vendet kanë bashkëpunuar në fushën e mbrojtjes që nga viti 1994. Deri më tani, 64 oficerë të ushtrisë janë dërguar në shkollat ​​e larta ushtarake në Turqi. Pjesëtarë të ushtrisë në misionin “Mbështetje e vendosur” në Afganistan ishin pjesë e kontingjentit turk, ndërkohë që aktualisht pjesëtarë të ushtrisë në operacionin e BE-së ALTEA në Bosnje dhe Hercegovinë janë pjesë e kontingjentit turk.