Pesë arsyet pse Xavi i tha ‘JO’ Barcelonës

Legjenda spanjolle, Xavi Hernandez, e ka njoftuar Barcelonën se nuk do ta marrë drejtimin e skuadrës gjatë këtij janari.

Edhe pse e ka pranuar se është ëndërr e tij që të bëhet trajner i klubit, me të cilin fitoi gjithçka, trajneri aktual i Al Sadd e ka refuzuar ofertën për ta zënë tash vendin e Ernesto Valverdes.

Lexo po ashtu Drejtori sportiv i Al-Sadd konfirmon bisedimet, por Xavi ka refuzuar ta marrë drejtimin e Barcës në janar

Ndërsa Marca i ka sjellë pesë arsyet pse ish-mesfushori i Barcës vendosi të vepronte kështu:

Është i sigurt se puna është e tij

Ai e ka pasur luksin ta refuzojë ofertë, pasi që e di se herët ose vonë do të bëhet trajner i Barcelonës. Prandaj, dëshiron ta nisë një projekt nga fillimi dhe jo nga mesi i sezonit.

Respekti për Ernesto Valverden

Xavi e konsideron veten si njeri i futbollit dhe ka respekt për trajnerin aktual të Blaugranëve. Duke e ditur se është një post që do ta marrë në të ardhmen, ish-mesfushori mendon se nuk do të ishte e ndershme që t’ia merrte punën Valverdes në këtë mënyrë.

Respekti për Al Sadd

Klubi nga Katari ia ka dhënë mundësinë spanjollit që ta nisë karrierën si trajner, prandaj nuk dëshiron t’i prishë raportet me drejtuesit e Al Sadd. Kontrata e tij është valide deri në vitin 2021 dhe plani ka qenë që ta respektojë këtë kontratë dhe pastaj të bëhet trajner i përfaqësueses së Katarit. Sidoqoftë, mundësia që ta nisë punën si trajner i Barcelonës në qershor, do ta prishë këtë plan.

Përkushtimi ndaj lojtarëve të tij

39-vjeçari nuk dëshiron t’i lë në baltë lojtarët e tij, pasi të premten ekipi i tij e zhvillon finalen e Kupës së Katarit kundër ekipit më të fortë në atë vend, Al Duhail. Në këtë mënyrë, ai e ka edhe shansin ta fitojë trofeun e dytë, pas Superkupës që e fitoi bë verën e kaluar.

Detyrimi moral ndaj Victor Font

Xavi nuk ka marrëdhënie të këqija me presidentin aktual të Barcelonës, Josep Maria Bartomeu, mirëpo ai ka një përkushtim moral ndaj Victor Font, i cili është njëri prej kandidatëve për president të klubit. Zgjedhjet pritet të mbahen në vitin 2021 dhe deri atëherë, ai pritet të ketë nisur drejtimin e Barcës.

/Telegrafi/