Përmbyllet Java e Lëvizjes

Lëvizja Vetëvendosje, ka njoftuar se sot është përmbyllur Java e Lëvizjes e cila ka filluar para dhjetë ditësh.

LVV bën të ditur se Java e Lëvizjes është përmbyllur sot më 17 qershor, në ditëlindjen e veprimtarit të çështjes kombëtare, profesori Ukshin Hotit, transmeton Telegrafi.

Në njoftimin e bërë për media nga LVV thuhet se kryetari Albin Kurti, së bashku me një delegacion nga Lëvizja, vizitoi paradite shtëpinë muze të Ukshin Hotit, për t’u kyçur pasdite në bashkëbisedimin e organizuar publik e të drejtuar nga Glauk Konjufca për mësimet dhe rëndësinë e jetës dhe veprës Ukshin Hotit.

“Bashkëbisedimi kishte shumë zëra të ndryshëm mbi shumanësinë e mendimit dhe veprimit politik të Ukshin Hotit. Sa profesor aq edhe tribun, sa institucional aq edhe jashtë institucional, Ukshini është emri i një figure të cilën nuk e rehatojmë dot në korniza të paracaktuara, por që na krijon korniza të reja dhe na problematizon ato të tjerat”, thuhet në njoftimin e LVV-së, përcjell Telegrafi.

Më tej, LVV thekson se “kërkimi i fatit të Ukshin Hotit është kërkimi i fatit tonë”.

“Vepra e tij është vetja jonë më e mirë, mundësitë e pamata të angazhimit tonë politik”./Telegrafi/