Përkeqësimi i motit, rikthehen lundrimet në Adriatik për tragetet Durrës-Bari

Pas pezullimit 24 orësh të lundrimeve nga Durrësi drejt Barit dhe anasjelltas, mbrëmjen e së shtunës tragetet e linjës Durrës-Bari do të vijojnë lundrimet e tyre.

Lajmi është konfirmuar këtë mesditë nga Kapiteneria e portit detar të Durrësit, ndërsa nuk ka ende një konfirmim deri në këtë moment nga autoritetet detare për nisjen e trageteve edhe nga porti italian i Barit drejt portit më të madh shqiptar.

Përkeqësimi i motit, veçanërisht në det të hapur, me një erë të fortë dhe det të dallgëzuar deri në 8 ballë çoi në marrjen e vendimit për pezullimin e përkohshëm të lundrimit për tragetet e linjës Durrës-Bari dhe anasjelltas.

Natën e kaluar tragetet e kësaj linje nuk u nisën nga të dyja brigjet e Adriatikut.

Të shtunën kushtet atmosferike janë më të qeta në brigjet e Adriatikut lindor, ku era që fryn nga veriu nuk shkakton probleme për lundrimin e trageteve nga Durrësi drejt Barit.

Gjithsesi deti vijon të jetë i dallgëzuar dhe lundrimi vijon i pezulluar për anijet e peshkimit dhe mjetet e vogla lundruese, të cilat duhet të presin qetësimin e motit për të rinisur lundrimet. Drejtoria e Përgjithshme Detare bën me dije se situata detare është në monitorim dhe për çdo ndryshim të kushteve atmosferike që ndikon lundrimin, do të ketë një komunikim nga autoritetet për publikun. /Tch/Telegrafi/