Për tragjedinë në Prizren flet dëshmitari: Nëna po rënkonte për vdekjen e vajzës

Tragjedinë e ndodhur sot në Prizren e ka përshkruar në detaje dëshmitari që kishte qëlluar në ato momente në vendin e ngjarjes, e që kishte provuar që t’i jap ndihmë nënës që u lëndua bashkë me dy vajzat, njëra prej të cilave vdiq nga plagët.

Prizrenasi Nue Spaqi, përmes një postimi në Facebook, thotë se nëna po ndjente vdekjen e vajzës. S’i hiqet nga sytë vajza e vogël gjysmë e zhveshur nga skamja.

Më poshtë lexoni të plotë dëshminë e tij të postuar në Facebook:

Isha dëshmitar në ngjarjen tragjike që ndodhi sot në Prizren, pash me sy një engjëll gjysmë të zhveshur nga mjerimi duke e zënë rrënojat e një shtëpie të gjysmë rrënuar në Qendrën Historike të qytetit.

U mundova që nënën e alivanosur ta rikthej në jetë e cila sapo u këndell kërkonte vajzën e saj, një nënë që rënkonte duke thënë se më vdiq vajza dhe unë po e ngushëlloja duke i thënë se do behet më mirë.

E mashtrova “dadën” edhe pse ajo e ndjeu vdekjen e fëmijës.

Migjeni do të thoshte: “Mjerimi rrit fëmin në hijen e shtëpive të nalta, ku nuk mrrin zani i lypsis, ku nuk mund t’u prishet qetsia zotnive kur bashkë me zoja flejnë në shtretënt e lumnis”.

Pusho në paqe engjëlli i vogël!

E JU që jeni përgjegjës për këtë tragjedi në kokat tuaja.