Për operatorin serb ndahen 60 mijë numra

Një operator telefonik me pronësi serbe do të funksionojë në dy kode shtetërore, 60 mijë numra dhe në 20 për qind të territorit të Kosovës për 18 muajt e ardhshëm.

Në kuadër të implementimit të marrëveshjes për kodin shtetëror telefonik, Autoriteti Rregullativ i Komunikimeve Elektronike dhe Postare ARKEP ka ndarë 60 mijë numra për një operator të përkohshëm telefonik.

Me marrëveshjen e arritur më 13 nëntor të vitit që shkoi në Dialogun Kosovë-Serbi në Bruksel, u vendos që Kosovës t’i takojë kodi shtetëror telefonik me kusht që në periudhën e tranzicionit drejt këtij kodi në Kosovë të funksionojë një kompani e përkohshme e quajtur Mts D.O.O.

Më 15 dhjetor të vitit 2016, Unioni Ndërkombëtar i Telekomunikacionit ndau për Kosovën kodin +383 si kod shtetëror i cili pritet të implementohet tërësisht deri në mesin e vitit të ardhshëm kur pritet largimi i kodeve të përdorura deri më tani.

Operatori i përkohshëm ngjalli reagime të shumta për shkak se është me pronësi të Serbisë.

‘Gazeta Jeta në Kosovë’ kishte gjetur se pronare e kompanisë së regjistruar në Kosovë është kompania “Telekom Srbija Ad Beograd”, pronare e së cilës është Qeveria e Serbisë.

Operatori i përkohshëm paralelisht me kodin e ri do ta përdorë kodin e Serbisë +381 dhe thirrjet nga Kosova drejt Serbisë përmes këtij operatori do të regjistrohen si thirrje lokale. /kallxo.com/