Pentagoni pranon qindra raporte për UFO-t

Një zyrë e re e Pentagonit e hapur për të gjurmuar raportet e objekteve të paidentifikuar fluturuese (UFO) ka marrë “disa qindra” raporte të reja – por nuk ka asnjë provë deri më tani për jetën aliene, sipas zyrtarëve të agjencisë.

Zyra për Zgjidhjen e Anomalive të të gjitha Domeneve (AARO) u krijua në korrik dhe është përgjegjëse jo vetëm për gjurmimin e objekteve të paidentifikuara në qiell, por edhe nën ujë ose në hapësirë — ose potencialisht një objekt që ka aftësinë të lëvizë nga një domen në tjetrin, transmeton Telegrafi.

Zyra u krijua pas më shumë se një viti vëmendje ndaj objekteve fluturuese të paidentifikuara që pilotët ushtarakë kanë vëzhguar, por ndonjëherë kanë hezituar t’i raportojnë për shkak të frikës nga stigma.

Agjencitë e inteligjencës amerikane thanë se midis vitit 2004 dhe 2021 kishte 144 paraqitje të tilla, 80 prej të cilave u kapën në sensorë të shumtë.

Që atëherë, “ne kemi pasur shumë më tepër raportime”, tha drejtori i zyrës së anomalive Sean Kirkpatrick. Kur u pyet për të përcaktuar sasinë e shumës, Kirkpatrick tha “disa qindra”.

Një raport i përditësuar me shifra specifike për raportet e reja pritet deri në fund të vitit.

Zyra e re u krijua jo vetëm për të shqyrtuar çështjen nëse ka jetë jashtëtokësore, por edhe për shkak të rrezikut të sigurisë që vjen nga kaq shumë takime me objekte të panjohura fluturuese nga instalimet ushtarake ose avionët ushtarakë. /Telegrafi/