Gary Cahill pensionohet zyrtarisht nga futbolli

Ish-mbrojtësi i Chelseat, Gary Cahill, ka njoftuar pensionimin e tij nga futbolli në moshën 36-vjeçare.

Ish-reprezentuesi anglez, i cili ka luajtur edhe për Aston Villan, Boltonin, Crystal Palacen dhe Bournemouthin e ka konfirmuar lajmin përmes një postimi në rrjetet sociale.

Suksesi më i mirë i Cahill erdhi në “Stamford Bridge”, ku ai fitoi çdo trofe të madh, duke përfshirë Ligën e Kampionëve dhe Ligën Premier.

“Futbolli është një lojë që më ka dhënë kaq shumë kënaqësi dhe sukses dhe ndërsa marr vendimin për të varur këpucët, mund të them sinqerisht se i dhashë gjithçka që kisha”, fillon shkrimi i mbrojtësit legjendar të Bluve.

“Kam arritur gjëra që kam ëndërruar dikur, duke krijuar disa kujtime të pabesueshme. Nga nivelet e mahnitshme si fitimi i Ligës së Kampionëve dhe Ligës Premier, deri te privilegji për të qenë kapiten i vendit tim dhe Chelseat në një ekip fitues të FA Cup do të mbeten me mua përgjithmonë”.

“Kam bërë gjithashtu disa miqësi fantastike me njerëz në mbarë botën e futbollit, nga shokët e skuadrës, trajnerët dhe heronjtë e pakënduar prapa skenave, dua të them vetëm një falënderim masiv”.

“Marrja e vendimit për të stopuar së luajturi nuk është e lehtë. Kam kaluar 20 vite duke u stërvitur çdo ditë, duke u munduar që të jem në formën më të mirë të mundshme për ditën e ndeshjes për të ndihmuar skuadrat për të cilat kam luajtur të jenë të suksesshme”.

“Kam pasur kohë për të shqyrtuar opsionet e mia dhe pas shumë diskutimesh dhe reflektimi ndjej se tani është koha për të kaluar në fazën tjetër të karrierës sime”, vazhdon shkrimi i tij.

Cahill kaloi sezonin e kaluar në Bournemouth, por nuk arriti të luajë gjatë katër muajve të fundit të sezonit pas një kartoni të kuq në një humbje në Barnsley më 29 janar, që dëshmoi paraqitjen e tij të fundit ndonjëherë. /Telegrafi/

View this post on Instagram

A post shared by Gary Cahill (@garyjcahill)