Pengim të personave zyrtarë dhe frikësim gjatë procedurës penale, seanca për pranimin e fajësisë të Shalës dhe Januzit më 18 dhjetor

Gjykata Speciale ka bërë të ditur se në çështjen gjyqësore Januzi dhe të tjerët, sot u bënë publike dy marrëveshje më vete për pranimin e fajësisë, ku Sabit Januzi dhe Haxhi Shala, secili më vete, pranuan fajësinë për një akuzë për pengim të personave zyrtarë në kryerjen e detyrave zyrtare dhe një akuzë për frikësim gjatë procedurës penale.

Në njoftim thuhet se secila nga marrëveshjet për pranimin e fajësisë bazohet në “faktet e pranuara”, me çka të akuzuarit pranojnë se disa fakte të paraqitura në aktakuzë do të vërtetoheshin jashtë dyshimit të arsyeshëm dhe janë të vërteta dhe sakta.

“Rregullorja e Procedurës dhe e Provave para Dhomave të Specializuara të Kosovës lejon që Prokurori i Specializuar dhe Mbrojtja të arrijnë marrëveshje për pranimin e fajësisë, e cila duhet të miratohet nga Trupi Gjykues para se të hyjë në fuqi. Trupi Gjykues është duke shqyrtuar aktualisht marrëveshjet për pranimin e fajësisë në këtë çështje gjyqësore”, thuhet në njoftim.

Lexo po ashtu Haxhi Shala dhe Sabit Januzi pranojnë akuzën e frikësimit të një dëshmitari dhe pengimit

Sipas rregullës 94 të Rregullores së Procedurës dhe të Provave së DHSK-së, Trupi Gjykues miraton marrëveshjen vetëm nëse gjykatësit binden se janë përmbushur disa kushte: se ekziston bazë faktike e mjaftueshme që vërteton faktet thelbësore të nevojshme për vërtetimin e veprës penale dhe pjesëmarrjen e të akuzuarit se avokati ka diskutuar marrëveshjen me të akuzuarin dhe se i akuzuari i kupton kushtet e marrëveshjes; se i akuzuari pranon fakte në lidhje me akuzat në marrëveshje dhe se pranimi është bërë pa kërcënime ose detyrim; se i akuzuari kupton pasojat e marrëveshjes dhe heq dorë nga e drejta për t’u gjykuar me procedurë gjyqësore të zakonshme se janë marrë parasysh si duhet interesat e drejtësisë.

Trupi Gjykues ka caktuar seancën për marrëveshjet për pranimin e fajësisë për 18 dhjetor, në orën 09:00 dhe ka rezervuar edhe 19 dhjetorin nëse do të jetë e nevojshme.

Tutje në njoftim thuhet se marrëveshja për pranimin e fajësisë midis Ismet Bahtijarit dhe Zyrës së Prokurorit të Specializuar nuk është bërë ende publike në këtë çështje gjyqësore.

“Hollësi të mëtutjeshme do të bëhen të ditura më vonë, sapo bëhen të disponueshme versionet e redaktuara publike dhe parashtrimet përkatëse”, thuhet në njoftim. /Telegrafi/