Peja ende shpreson për gjysmëfinalen e BIBL-it

Humbja e fundit nga Sigal Prishtina nuk e ka zmbrapsur skuadrën e Pejës nga synimet që ka për këtë edicion, shkruan sot Koha Ditore.

Kështu ka thënë të enjten njëri prej basketbollistëve më të dalluar të Pejës, Drilon Hajrizi. Peja të mërkurën mbrëma u mposht nga Sigal Prishtina (85:84) në kuadër të xhiros së tretë të fazës së dytë të Ligës Ballkanike. Kjo ishte humbja e tretë e Pejës gjatë këtij viti në tri ndeshje kundrejt Sigal Prishtinës.

Pejanët edhe në finalen e Kupës së Kosovës u mposhtën me rezultat të ngushtë nga Sigal Prishtina (81:78) dhe kjo në sekondat e fundit me trepikëshin e realizuar nga Willie Kemp. Të mërkurën Hajrizi pati aksionin e fundit dhe mundësinë për t’ia dhuruar ekipit të tij fitoren, por dështoi dhe ndeshja u mbyll 85:84 për Prishtinën.

Pas kësaj humbje të Pejës, të dy skuadrat kanë nga tri fitore e tri humbje në gjashtë përballjet e tyre të këtij sezoni në të gjitha garat. Peja ishte dominante në vjeshtë.

"Kemi ekip për të shkuar tutje, por definitivisht mund të them se fati na e ka kthyer shpinën në ndeshjet e fundit edhe pse po tregojmë lojë të mirë", ka insistuar Hajrizi. "Përfundimisht, nuk i kemi pritur këto tri humbje nga Prishtina. Të them të drejtën, kam pritur të paktën një fitore, por ne jemi dëshmuar si ekip i fortë, pasi dy ndeshjet e fundit i kemi humbur ngushtë".