Peci: Forcimi i bashkëpunimit në bujqësi do ta lehtësojë tregtinë e vendeve të Evropës Juglindore

Ministri i Bujqësisë, Pylltarisë dhe Zhvillimit Rural, Faton Peci mori pjesë sot në takimin e rregullt vjetor të Ministrave të Bujqësisë të vendeve të Evropës Juglindore (EJL), që këtë vit është mbajtur në Tiranë.

Temat të cilat u diskutuan gjatë këtij takimi në fokus kishin avancimin e bashkëpunimit rajonal dhe përafrimin e politikave zhvillimore të vendeve kandidate dhe atyre potenciale për kandidate në fushën e bujqësisë dhe zhvillimit rural, avancimin drejt plotësimit të kritereve të IPARD-it, si dhe rrugëtimin drejt implementimit të Agjendës së Gjelbër të Bashkimit Evropian përmes politikave shtetërore.

“Ministri Peci gjatë adresimit të tij theksoi nevojën e bashkëpunimit ndër-shtetëror dhe shkëmbimin e eksperiencave dhe praktikave më të mira, të cilat do avanconin vendet e Ballkanit Perëndimor, duke pasur në fokus zhvillimin e potencialit të përbashkët ekonomik. Ai gjithashtu foli për rëndësinë që paraqesin zonat rurale, sidomos ato të cilat gjenden në zona ndër-kufitare, siç është trekëndëshi Sharr-Kukës-Dibër, me potencial të lartë të kultivimit të bimëve mjekësore dhe aromatike”, thuhet në njoftim.

Më tej, në njoftim thuhet se “Peci potencoi se forcimi i bashkëpunimit rajonal në sektorin e bujqësisë dhe ekonomisë rurale është thelbësor dhe do të çonte në përmirësimin e konkurrueshmërisë së sektorit dhe në lehtësimin e tregtisë ndërmjet vendeve të Evropës Juglindore”.

“Karshi Agjendës së Gjelbër, Ministri Faton Peci theksoi punën e Ministrisë së Bujqësisë në finalizimin e Strategjisë për Bujqësi dhe Zhvillim Rural 2021 – 2027, strategji kjo e cila do t’i adresojë një sërë veprimesh mjedisore e klimatike përveç se bujqësore”, bëhet e ditur në komunikatë.

Takimi i 15-të vjetor i Ministrave të Bujqësisë së Evropës Juglindore u organizua në bashkëpunim me Grupin e Përhershëm të Punës për Zhvillimin Rural Rajonal (RRD SWG) dhe Ministrinë e Bujqësisë dhe Zhvillimit Rural të Shqipërisë, institucion ky i cili mikpriti homologët e vendeve të rajonit dhe me ç’rast mori udhëheqjen zyrtare të këtij grupi. /Telegrafi/