Pasioni për motorët nuk njeh moshë e profesion, rrëfimi i Stilianit dhe Edonit

Kur flitet për shpejtësinë, mendja të shkon tek motorët. Ka njerëz që i duan, i adhurojnë dhe i bëjnë pjesë të jetës së tyre, pavarësisht rrezikut që mund të përballen, shkak shpejtësia.

E, se pasioni nuk njeh moshë e profesion e tregojnë dy motoristët nga Gjakova, Stilian Hoda dhe Edon Mati.

Stilian Hoda është menaxher në një bankë, por pasionin për motorin e tregon hapur dhe me shumë entuziazëm.

Hoda për Telegrafin tregon se dashurinë për motor e ka qysh nga fëmijëria.

Ai tha se ky pasion e ndihmon të relaksohet, dhe gjithë stresin ditor ai e shkarkon duke bërë xhiro me motor.

“Dashninë për motor e kam qysh nga fëmijëria. Kam filluar nga motorë më të vegjël, e kam arritur tek ky motor. Ky pasion është dhe pak relaks i trurit, dertet, hallet e puna që të shkaktojnë stres me ketë motor i qes jashtë”, tha Hoda, duke shtuar se me motor ka dal edhe përtej kufijve, deri në Bullgari.

Mirëpo, ai shprehu dhe një dëshirë: “Për qejf isha shku në turne në krejt botën, por e kemi problem çështjen e vizave”.

Edhe Edon Mati, i cili merret me gastronomi tha motorin e ka pasion, duke e radhitur si të tretën pas familjes dhe punës të cilën ai e ushtron.

“Që 18 vite merrem me këtë pasion, motorin. Shkurt është ‘feeling free’. Familja e para, puna e dytë, motori i treti. Merrem me hotelieri, gastronomi dhe biznes familjar”, tregoi i apasionuari ndaj motorit, Edon Mati. /Telegrafi/ 

Foto: Korab Basha

Foto: Korab Basha