Pas zjarrit, Instituti i Mjekësisë Ligjore në “mëshirë të fatit”

Instituti i Mjekësisë Ligjore para më shumë se dy jave u kaplua nga zjarri dhe se ende nuk ka filluar asnjë pjesë e atij objekti të renovohet.

Pas gati tre javësh, që kur ka ndodhur zjarri në Institutin e Mjekësisë Ligjore, ende nuk ka filluar sanimi i dëmit të shkaktuar nga zjarri.

Dritaret e hapura e ambienti totalisht i shkatërruar në dy zyre, nuk kanë ndryshuar ndonëse punët po kryhen nga ky institucion.

E pse nuk kanë filluar renovimet, tregoi ushtruesi i detyrës së drejtorit të IML-së.

“Nuk ka filluar asnjë renovim, sepse ende jemi në procedura të vlerësimit të dëmit dhe sigurisë së objektit, kështu që nuk ka çka me u pa në këtë fazë”, deklaroi Ditor Haliti për TV Dukagjinin.

Lexo po ashtu Zjarri në IML, Haxhiu me dyshime: Nuk mund të besoj që djegia ndodh dy herë radhazi e nuk bëhet nga dora e njeriut

Se kur mund të fillojnë renovimet apo në cilën fazë të vlerësimit të dëmit gjendet ky objekt, nuk ka kthyer përgjigje nga Ministria e Drejtësisë.

Por shpresa që renovimi mund të fillojë shpejt, nuk ka ish-sekretari në Ministrinë e Drejtësisë, Ardian Bajraktari.

“Jemi relativisht në fund të vitit fiskal, prandaj në rrjedhë të kësaj, natyrisht që duke qenë se është ka qenë tragjedi, ka qenë e paplanifikuar, e paparashikuar dhe mjete buxhetore të ndara për këtë çështje nuk ka pasur. Duke qenë se tashmë ë jemi në fundvit, vlerësoj që Ministria e Drejtësisë do të duhej fillimisht të parashihte mjete buxhetore për renovimin e këtij objekti”, deklaroi Bajraktari.

Në lidhje me temën është pyetur edhe Prokuroria se në çfarë faze të hetimeve është rasti për zjarrin aty, por të njëjtën nuk janë përgjigjur.