Pas lajmit për rrahjen brutale të dy shqiptarëve në Novi Sad, reagon edhe i pari i Komunës së Preshevës

Pas lajmit se në Novi Sad të Serbisë janë rrahur brutalisht dy shqiptarë, vetëm pse folën shqip, ka reaguar edhe i pari i Komunës së Preshevës, Shqiprim Arifi, i cili në një postim në Facebook, shkroi se kjo pasqyron qasjen e politikave destruktive ndaj shqiptarëve në Republikën e Serbisë.

Ndërkaq, në natën mes të shtunës dhe dielës, dy të rinj shqiptarë të moshës 19-vjeçare janë rrahur brutalisht nga disa persona, ku nga plagët e marra njëri prej tyre është dashur t’i nënshtrohet intervenimit kirurgjik për t’i shpëtuar vdekjes, transmeton Telegrafi.

Më poshtë mund të lexoni postimin e plotë:

“Rrahja e dy të rinjve shqiptar në qytetin e Novi Sadit pasqyron qasjen e politikave destruktive ndaj minoritetit etnik shqiptar në Republikën e Serbisë. Gjithashtu na shqetëson tejëmase informatat se të rinjët shqiptarë janë rrahur për shkak se paskan folur në gjuhën e tyre amtare shqipe.

I bëj thirrje organeve përkatëse shtetërore të hetohet rasti menjëherë, të ndëshkohen personat përgjegjës dhe të mirren masat adekuate për parandalimin e rasteve të tilla.

Ndërkohë ftoj organizatat ndërkombëtare për mbrojtjen e të drejtave të njeriut që të analizojn rastin dhe të trajtohen me prioritet shkeljet e të drejtave individuale dhe kolektive të shqiptarëve në Republikën e Serbisë. Është e drejtë elementare e mbrojtur me konventa ndërkombëtare që minoritetet gjegjësisht shqiptarët të flasin gjuhën e tyre amtare pa pasoja fizike anekënd botës e veçanërisht në Republikën ku jetojmë”. /Telegrafi/