Parregullsi në dhënien e tenderit për ndërtimin e gazsjellësit Shtip-Negotinë

Disa kompani që u nxorën jashtë lojës për ndërtimin e gazsjellësit Shtip – Negotinë do ta apelojnë procedurën, mëson Alsat – M. Ata besojnë se janë përjashtuar padrejtësisht nga Resurset Energjetike të Maqedonisë të cilët e kanë kryer ankandin elektronik. Nga ky institucion heshtin prej më shumë se një javë për këtë procedurë, edhe pse në ankand u zgjodh kompania që do ta ndërtojë gazsjellësin. Por, nga REM nuk zbulojnë detaje as për zgjedhjen e kompanisë që do ta ndërtojë gazsjellësin, as për arsyet e përjashtimit të kompanive të tjera, transmeton Telegrafi Maqedoni.

Gazsjellësi Shtip-Negotinë do të ndërtohet me një kosto prej 15.8 milionë euro dhe kjo është shuma që është arritur në ankand, ku morën pjesë vetëm dy konsorciume. Praktikisht, në ankand kanë marrë pjesë dy konsorciume që kanë pasur ofertat më të larta, ndërsa konsorciumet me ofertat më të ulëta janë përjashtuar më parë.

Sipas informatave, për fitues të tenderit është zgjedhur kompania Rapid Bild, që është në pronësi të biznesmenit kumanovar Toni Karanfilovski, i cili konsiderohet si njeri i afërt i partisë në pushtet. Kompanitë e Karanfilovskit tashmë janë duke punuar në ndërtimin e gazsjellësit Klevçovcë-Shtip. Dhe pikërisht Karanfilovski, me anë të kompanive të tij, direkt para se ta merr biznesin me gazsjellësin në Kleçovcë, e bleu edhe fabrikën e tubacionit në Kumanovë “FZC 11 tetori”, e cila nga ana tjetër konsiderohet se do duhet të luajë një rol kyç në këtë biznes fitimprurës.

Njëkohësisht, derisa procedurën për përzgjedhjen e kompanisë për ndërtimin e gazsjellësit Shtip-Negotinë e tronditin afera kontroverse, skandale dhe jotransparencë, institucioni kompetent REM do të duhet ti vlerësojë edhe ofertat për pjesën Shkup- Gostivar./Telegrafi/