Parku solar prej 100 megavat në KEK mund të jetë gati për një vit

Kryeshefi ekzekutiv i Korporatës Energjetike të Kosovës, Nagip Krasniqi ka thënë se KEK-u planifikon të ndërtojë 100 megavat kapacitete solare në sipërfaqen e termocentralit Kosova A.

Kur diskutoi për strategjinë e ardhshme të energjisë, drejtori ekzekutiv i KEK, Nagip Krasniqi theksoi rolin e pashmangshëm të KEK-ut në sektorin e energjisë, si prodhuesi më i madh i energjisë elektrike në vend.

Ai ndau se janë dërguar propozime në Ministrinë e Ekonomisë, të cila sipas tij, përveç investimeve për mirëmbajtjen e kapaciteteve ekzistuese, përfshijnë edhe projekte për energjinë e ripërtëritshme.

Sipas Krasniqit, KEK-u po kërkon të zhvillojë një park solar 100 MW në një nga ish-deponitë e ‘Kosova A’, dhe ai beson se nëse jo i gjithë kapaciteti, gjysma e tij do të jetë gati brenda një viti.

“Qasja jonë është se kemi dërguar propozimet tona, që parashohin në kuptim përveç pjesës së mirëmbajtjes investimeve në kapacitete ekzistuese, ne parashohim të ndërtojmë edhe parqe solare”, tha ai.

“Ne tani veç jemi në një proces me KfW gjermane me BE-në që të fillojmë një projekt prej 100MW, park solar, në ish deponinë e Kosova A”, bëri të ditur Krasniqi.

“Unë sot kam pasur një bisedë me përfaqësuesit e Kfw, të shkurtër jo shumë formale, edhe ku tek ata mund të ketë edhe probleme burokratike deri sa kjo zgjidhet, që në fakt më herët ka qenë edhe te KEK-u e njëjta gjë, kështu që këto gjëra kanë shkruar shumë ngadalë”, tha ai.

“Unë kam plan që këto t’i përshpejtojë edhe sigurisht që edhe ata do t’i përshpejtojnë dhe unë besoj që nuk duhet të jetë më shumë se 1 vit, që do t’a kemi një park solar qoftë për 50MW e para”, theksoi Krasniqi. /buletiniekonomik/