Parku i Butrintit, Meta: E papranueshme që shteti të heqë dorë nga përgjegjësitë

Ditën e djeshme Presidenti i Shqipërisë Ilir Meta ka kthyer për rishqyrtim ligjin për projektin e Butrintit, i kundërshtuar fort nga opozita.

Lidhur me këtë vendim, Presidenti Meta ka dalë sot në një konferencë për mediat ku ka thënë se është e papranueshme që shteti të heqë dorë nga çdo përgjegjësi për pasuri të tilla dhe të ia kalojë ato privatit.

“Parku Kombëtar i Butrintit është një pasuri e paluajtshme e regjistruar në listën botërore të UNESCO-s. Sipas Konventës së Trashëgimisë, përgjegjësia mbi këto objekte nuk mund të kalojë në organizatat jo-qeveritare, por mbetet te shteti. Shteti nëse do ta aplikojë këto formë të re, do të duhet ta ruante të palëkundur, të zotëronte dhe të drejtën e vetos në funksion të respektimit të Kushtetutës”, ka thënë Meta.

“Duhet të bëhej në përputhje me përgjegjësitë shtetërore e jo të fragmetizuara në plane 10-vjeçare. Shteti nëse do të aplikojë këtë formë të re administrimi nëpërmjet një fondacioni, duhet të ruante rolin e tij”, ka shtuar Meta.

Lexo po ashtu Meta kthen për rishqyrtim në Kuvendin e Shqipërisë marrëveshjen për administrimin e Butrintit

“Nëse qeveria sot deklaron mos garantimin në perspektivë të vlerave, si mund ta garantojë atë me një pjesëmarrje në një fondacion ku rolin dhe vendimmarrjen e ka të kufizuar? Presidenti nuk është kundër bashkëpunimit shtet-privat”, sipas Presidentit.

“E papranueshme logjika që për një pasuri me vlera kaq të larta për trashëgiminë kulturore, shteti të heqë dorë nga çdo përgjegjësi kur vetë shteti është futur në një formë ku nuk zbaton dot rolin kontrollues. Për një pasuri me vlera të tilla duhej marrë një komunikim i ngushtë me të gjithë. Mungesa e transparencës është evidentuar nga ish-anëtarë të bordit të përzgjedhur”, sqaron Meta.

“Asgjë e keqe nuk mund t’i vijë Kuvendit nga diskutimet, nga konsulta. Kjo është e papranueshme pasi ajo që po jep shteti është një pasuri publike duhet të mbikëqyret si nga auditues ndërkombëtarë ashtu dhe nga KLSH. Kjo do të garantonte mirë-administrimin e të ardhurave”, shton Presidenti.

Në Parkun e Butrintit do të bëhet investim nga Fondi Shqiptaro-Amerikan, zonë e cila krahas aktivitetit ekonomik tha se do të kthehet në hartën e parqeve pa karbon. /Telegrafi/