Bullgaria mirëpriti të dielën aeroplanin e saj të parë luftarak F-16 të prodhuar nga SHBA, i porositur si pjesë e përpjekjeve historike të anëtarit të NATO-s në krahun lindor për të modernizuar forcën e saj ajrore.
Për të zëvendësuar aeroplanët e saj MiG-29 të epokës sovjetike, Bullgaria ka porositur 16 aeroplanë F-16 amerikanë për një kosto prej rreth 2.4 miliardë euro (2.7 miliardë dollarë), në kontratën më të madhe për të riparuar forcat e saj të armatosura që nga rënia e komunizmit në vitin 1989, shkruajnë mediat e huaja, përcjell Telegrafi.
Në një ceremoni që shënonte dorëzimin e aeroplanit në bazën ushtarake Graf Ignatievo në Bullgarinë qendrore, kryeministri Rossen Jeliazkov tha se të pranishmit po festonin "modernizimin e paepur dhe të pakthyeshëm të ushtrisë bullgare”.
Ndërsa zyrtari amerikan i mbrojtjes, David Baker, e përshëndeti dorëzimin e aeroplanit si "një moment historik i rëndësishëm".
Pas dorëzimit të aeroplanit të parë të dielën, shtatë F-16 të tjerë do të dorëzohen deri në fund të vitit 2025, ndërsa tetë të tjerët do të mbërrijnë deri në vitin 2027.
Bullgaria, e cila vitin e kaluar festoi 20-vjetorin e hyrjes së saj në NATO, ka vonuar për një kohë të gjatë modernizimin e forcave të saj ajrore për arsye politike dhe financiare.
Por, si te anëtarët e tjerë lindorë të aleancës së mbrojtjes të udhëhequr nga SHBA, pushtimi i Rusisë në Ukrainë ka detyruar një rishikim të qëndrimit të saj mbrojtës.
Anëtari më i varfër i Bashkimit Evropian tani shpenzon më shumë se niveli bazë i NATO-s, 2 për qind të Prodhimit Kombëtar për mbrojtjen - edhe pse ende shumë më poshtë se 5 për qind e kërkuar tani nga presidenti i SHBA-së, Donald Trump.
Si rezultat i flotës së vjetëruar, pilotëve luftarakë të vendit u mungon trajnimi, sipas një raporti të qeverisë të vitit 2024, i cili gjithashtu vuri në dukje mungesën e personelit të kualifikuar. /Telegrafi/
