Parashikim: Superkupa e Italisë

Sezoni në futbollin evropian pritet të nisë këtë fundjavë me dy ndeshje të mëdha, me dy ndër derbit lokalë më të mëdhenj në botë, ndërsa po aq të mëdha dhe të rëndësishme sa janë këto sfida, ashtu dhe me rëndësi janë preludet e tyre, apo siç i themi ne parashikimet.

Milan – Inter
Vendi: Stadiumi “Foleja e Zogut”, Pekin
Koha: E shtunë, 6 gusht – ora 14:00

Të vazhdohen triumfet

Kampioni i Italisë, Milani në sfidën e parë serioze për sezonin e ri pritet të hyjë si favorit. Kjo marrë parasysh mbrojtjen e jashtëzakonshme dhe përforcimet e mençura të bëra gjatë afatit kalimtar veror.

Duke parë dobësitë që ka Interi dhe formën e mirë të kuq e zinjve nën trajnerin tashmë njëvjeçar në atë post, Massimiliano Allegri, Milani pa kurrfarë dyshimi është favoriti për Superkupën që zhvillohet në Pekin.

Forma e lartë e Ibrahimovic dhe rikthimi në ekip i jugamerikanëve mund të jenë krucial në këtë takim dhe nëse gjithçka shkon sipas planit për ‘Mr. Allegrin’ atëherë në fund do të jetë Massimo Ambrosini ai që do ta ngrisë trofeun.

Hakmarrja, opsioni i vetëm

Interi i Gian Piero Gasperinit ka shfaqur formë të luhatshme në parasezonë dhe me trajnerin e ri ende të pa përshtatur me ekipin dhe me disa lojtarë të cilët janë pranë largimit, Nerazzurët vështirë se mund të konsiderohen favoritë për sfidën e të shtunës duke vënë kështu pikëpyetje të mëdha mbi kredencialet e zikaltërve.

Lojtarë të tillë si Wesley Sneijder nuk kanë arritur që të përshtaten me formacionin e ri 3-4-3 të Gasperinit dhe me Antonio Alvarez i cili shfaqi mungesë të shpejtësisë ndaj mbrojtësve të kategorisë së rëndë, Interi ka mungesë në kreativitet në lojë.

Duhet të përmendim se Interi në këtë takim do të paraqitet pa jugamerikanët përpos Javier Zanettit i cili është ftuar me urgjencë në ekip pas lëndimit të Yuto Nagatomos.

Sidoqoftë, kjo është një ndeshje zyrtare dhe humbjet në parasezonë as se si nuk pritet të ndikojnë në moralin e lojtarëve zikaltër të cilët do të luajnë në derbin ndaj rivalit lokal, në sfidën e parë serioze të sezonit.

Forma e Milanit
Bayern Munich 1-1 Milan
Internacional 2-2 Milan

Forma e Interit
Inter 6-1 “11-shja më e mirë se Serie D”
Mezzocorona 1-6 Inter
Cremonese 1-4 Inter
Galatasaray 0-0 Inter
Inter 2-0 Celtic
Man. City 3-0 Inter

Përbërjet e skuadrave

Milan

Milani në këtë takim do të parpaqitet me të gjithë lojtarët dhe nuk ka mungesa të mëdha. Po ashtu vlen të përmendet se në këtë takim do të luajnë edhe jugamerikanët të cilët ishin të angazhuar në Copa America.

Formacioni i mundshëm i Milanit (4-3-1-2): Abbiati, Antonini, Nesta, Silva, Abbate, Van Bommel, Ambrosini, Boateng, Robinho, Pato, Ibrahimovic.

Inter

Nerazzurët do të paraqiten në këtë takim me mungesa të theksuara. Yuto Nagatomo dhe Emiliano Viviano mungojnë për shkak të lëndimeve të rënda. Lojtarët tjerë jugamerikanë që ishin të angazhuar në Copa America nuk do të luajnë, për shkak të pushimit të detyruar të urdhëruar nga trajneri Gasperini.

Formacioni i mundshëm i Interit (3-4-3): Julio Cesar, Ranocchia, Samuel, Chivu, Motta, Muntari, Sneijder, Alvarez, Eto’o, Castaignos, Pazzini.

Epilogu

Për shkak të kushteve jo të zakonshme atmosferike në Pekin dhe atmosferës në përgjithësi, të ndikuar nga rëndësia e takimit, pritet që të shohim një lojë jo dhe aq të hapur, marrë parasysh përbërjen e Milanit. Janë Rossonerët ata që me anë të mbrojtjes së hekurt dhe forcës fizike, do të tentojnë ta thyejnë Interin, ashtu siç bëri Manchester City në Dublin Cup, ndërsa në fund pritet që t’i shohim kampionët në podiumin triumfal.

Parashikim: Milan 1-0 Inter

/Telegrafi/