Paraburgim 30 ditor për tre të dyshuarit për vrasjen e trefishtë në Dibër

Prokuroria Publike Themelore Gostivar solli urdhër për zbatimin e procedurës hetimore kundër tre personave, të cilët dyshohet se janë përfshirë në vrasjen e familjes treanëtarëshe në Dibër.

Sipas kumtesës së PTHP-së, e dyshuara e parë, një femër e moshës 28-vjeçare, është nën hetim pasi ekzistojnë baza për dyshim se ka kryer vepër penale – vrasje sipas nenit 123 paragrafi 3 nga Kodi Penal. Për dy të dyshuarit e tjerë, një burrë 31-vjeçar nga Gostivari dhe një banor 62-vjeçar i Dibrës, ekziston dyshimi se i kanë ndihmuar në kryerjen e vrasjes, sipas nenit 123 paragrafi 3 lidhur me nenin 24 të Kodit Penal.

Lexo po ashtu “Nuk më lanë të martohem me italian”, vajza e madhe arsyeton vrasjen e prindërve në Dibër

“Duke vlerësuar se janë plotësuar kushtet ligjore, prokurori publik kompetent gjykatësit i dorëzoi Propozim për përcaktimin e masës së arrestit për tre personat e dyshuar. Ky propozim u pranua dhe gjykatësi të dyshuarve u ka caktuar masë arresti në kohëzgjatje prej 30 ditësh”, thuhet në njoftimin e PTHP-së.

Ata shtojnë se procedura hetimore do të vazhdojë në drejtim të ndriçimit të plotë të këtij rasti dhe sigurimit të dëshmive materiale./Telegrafi/