Papa dënon sulmet izraelite në Gaza: Kjo është mizori, nuk është luftë

Papa Françesku ka dënuar sulmet ajrore izraelite në Gaza, një ditë pasi një ministër i qeverisë izraelite denoncoi publikisht Papën për sugjerimin që komuniteti global duhet të studiojë nëse ofensiva ushtarake atje përbën gjenocid

Françesku hapi fjalimin e tij vjetor të Krishtlindjeve me atë që duket të jetë një referencë ndaj sulmeve ajrore izraelite të premten që vranë të paktën 25 palestinezë në Gaza.

“Dje u bombarduan fëmijët”, tha Papa.

“Kjo është mizori. Kjo nuk është luftë. Doja ta them këtë sepse më prek zemrën”, shtoi ai.

Papa, si udhëheqës i Kishës Katolike Romake prej 1.4 miliardë anëtarësh, zakonisht është i kujdesshëm për të marrë anën në konflikte, por kohët e fundit ai ka qenë më i hapur për fushatën ushtarake të Izraelit kundër grupit militant palestinez Hamas, shkruan Reuters.

Në fragmentet e librit të botuar muajin e kaluar, Papa tha se disa ekspertë ndërkombëtarë thanë se “ajo që po ndodh në Gaza ka karakteristikat e një gjenocidi”.

Ndërkohë, ministri izraelit i Çështjeve të Diasporës, Amichai Chikli kritikoi ashpër këto komente në një letër të hapur të pazakontë të botuar nga gazeta italiane Il Foglio të premten.

Çhikli tha se vërejtjet e Papës përbënin një “banalizim” të termit gjenocid.

Ndryshe, Françesku njoftoi se peshkopi katolik i Jerusalemit ishte përpjekur të hynte në Rripin e Gazës për të vizituar katolikët atje, por iu refuzua hyrja. /Telegrafi/