Panairi i Punës në Mitrovicë, ofron rreth 500 vende të punës dhe praktikës në punë

Panairi i Punës 2019 sot u hap në sallën e sporteve “Minatori” në Mitrovicë, në bashkëpunim me Ministrinë e Punës dhe Mirëqenies Sociale (MPMS), Agjencinë e Punësimit të Republikës së Kosovës(APRK), Komunën e Mitrovicës si dhe Zyrën Gjermane për Bashkëpunim Ndërkombëtar (GIZ).

Në një njoftim për media thuhet se në këtë edicion të Panairit të Punës, prezentë janë 55 kompani dhe institucione tjera jo vetëm të Mitrovicës por edhe të vendeve tjera të rajonit të cilat së bashku kanë hapur rreth 500 vende pune apo punë praktike me mundësi vazhdimi.

Hapjen e Panairit e ka bërë kryetari i Komunës, Agim Bahtiri, i cili tha se ndjehet i kënaqur që është pjesë e hapjes së këtij panairi e cila është një mundësi e mirë si për bizneset ashtu edhe për punëkërkuesit që të përfitojnë nga njëri tjetri.

Ndërsa drejtori i Zyrës së Punësimit në Mitrovicë, Besmir Salihu, ka folur për rëndësinë e këtij panairi, ku punëdhënësit dhe punëkërkuesit kanë mundësi të marrin informacione për tregun e punës.

Panairi i Punës qysh në orët e para të mëngjesit zgjoi interesim të madh tek të rinjtë dhe qytetarët tjerë të Mitrovicës dhe do të jetë i hapur deri në ora 16:00. /Telegrafi/