Pacolli takon ambasadorët e Quintit në Kosovë

Zëvendëskryeministri i parë i Republikës së Kosovës dhe njëherit ministri i Punëve të Jashtme, Behgjet Pacolli, ka pritur në takim ambasadorët e vendeve të Quintit në Kosovë.

Në këtë takim, është diskutuar për prioritetet e politikës së jashtme të Kosovës dhe veçmas përkushtimin e ministrit Pacolli për koordinim të ngushtë me të gjitha shtetet partnere amerikane dhe evropiane në agjendën ndërkombëtare.

Në njoftimin e bërë për media nga Ministria e Punëve të Jashtme të Kosovës thuhet se, Pacolli i ka siguruar ambasadorët se në mesin e prioriteteve kryesore është vendosmëria për të përdorur politikën e jashtme të Kosovës, jo vetëm për të zgjeruar dhe ushtruar sovranitetin, por edhe për qëllime të politikës së brendshme sikurse janë rritja e investimeve të huaja direkte në Kosovë.

“Kjo do të ndodhë në baza ditore dhe në mënyrë strategjike për të gjitha çështjet që kanë të bëjnë me anëtarësimin në organizata ndërkombëtare në procesin e njohjeve dhe deri tek rritja e investimeve të huaja direkte në Kosovë”, thuhet në njoftim.

Po sipas njoftimit, ambasadorët e shteteve të Quint-it vlerësuan lartë angazhimin dhe përkushtimin e ministrit Pacolli rreth aktiviteteve të tij diplomatike./Telegrafi/