Osmani takim virtual me drejtoreshën e USAID-it, flasin për përgatitjet rreth formimit të institucioneve

Ushtruesja e detyrës së presidentes, Vjosa Osmani – Sadriu, mbajti sot takim virtual me drejtoreshën e USAID-it, Lisa Magno, ndërsa kanë folur për përgatitjet që janë duke u bërë për formimin e institucioneve të reja dhe për prioritetet e qeverisjes së ardhshme.

Në njoftim thuhet se Magno shprehu interesimin e saj për përgatitjet që janë duke u bërë për formimin e institucioneve të reja, dhe për prioritetet e qeverisjes së ardhshme.

U.d presidentja Osmani theksoi se ndër prioritetet e para do të jetë menaxhimi me pandeminë, përkatësisht sigurimi sa më i shpejtë dhe në sasi sa më të madhe i vaksinës kundër COVID-19, për të cilën ripërsëriti që Kosova llogaritë në shtetet mike për ndihmë në atë drejtim, veçmas shtetet që deri tani ia kanë dalë në këtë drejtim.

Tutje, si prioritet, Osmani shtroi çështjen e drejtësisë, luftimin e krimit dhe korrupsionit, krijimin e vendeve të punëve dhe fuqizimin e gruas, duke nënvizuar që progresi në këto fusha është i domosdoshëm për një shtet të qëndrueshëm dhe funksional. /Telegrafi/