Volodymyr Zelenskyy ka thënë se nuk do të tradhtojë interesin kombëtar të Ukrainës, ndërsa po shqyrton planin e paqes të SHBA-së.

Por presidenti i Ukrainës paralajmëroi se java e ardhshme do të jetë shumë e vështirë për vendin, pasi përballet me zgjedhjen midis humbjes së një partneri të madh ose dinjitetit të tij.

Në një deklaratë video, ai tha se nuk do ta lejonte Rusinë të akuzonte Ukrainën për prishjen e çdo procesi paqeje, ndërsa vendi i tij përballet me një nga momentet më të vështira në historinë e tij.

“Ukraina do të punojë shpejt dhe në mënyrë konstruktive me SHBA-në”, tha Zelensky, ndërsa i kërkoi qeverisë së tij dhe parlamentit të vendit të punojnë së bashku.

Komentet e Zelenskyt vijnë pas raportimeve nga Reuters se SHBA-të duan që një kuadër i marrëveshjes së tyre të paqes të nënshkruhet deri në Ditën e Falënderimeve, e cila është e enjtja e ardhshme.

Ja çfarë tha ai në videomesazh:

Ky është një nga momentet më të vështira në historinë tonë. Presioni mbi Ukrainën sot është ndër më të rëndët që kemi përballuar ndonjëherë. Aktualisht, Ukraina mund të përballet me një vendim jashtëzakonisht të vështirë. Ose humbjen e dinjitetit ose rrezikun e humbjes së një partneri kyç. Ose pranimin e një liste të ndërlikuar prej 28 kërkesash ose përballimin e një dimri jashtëzakonisht të ashpër, më të ashprin deri më tani, me të gjitha rreziqet që vijnë pas. Një jetë pa liri, pa dinjitet, pa drejtësi. Dhe të gjitha këto ndërkohë që na kërkohet t'i besojmë dikujt që na ka sulmuar dy herë. /Telegrafi/



Nga BotaBotë