Opozita në Gjilan refuzon raportin financiar dhe projektin për Inkubatorin e Biznesit

Komuna e Gjilanit ka njoftuar se Komiteti për Politikë dhe Financa, nën udhëheqjen e Kushtrim Kadriut, nuk ka rekomanduar për Kuvend raportin gjashtëmujor të kryetarit, raportin financiar janar-qershor dhe projekt-propozimin e buxhetit për vitin fiscal 2025.

Përmes një komunikate për media, opozita votoi kundër këtyre pikave, duke pretenduar se raportet janë jorelevante, pasi sipas tyre po përfundon 9-mujori i vitit, dhe duke theksuar se ata janë përjashtuar nga dëgjimet buxhetore.

“Në këtë rast, partitë opozitare (LDK-AAK-Vatra), të cilat votuan kundër, janë arsyetuar se raporti gjashtëmujor i kryetarit dhe raporti financiar tashmë janë jorelevante e post-festum, meqë po përfundon 9-mujori i këtij viti, ndërsa për projekt – propozimin e buxhetit për vitin fiskal 2025, u tha se opozita është përjashtuar nga organizimi i dëgjimeve buxhetore”,  thuhet në komunikatë.

Kryetari i Komunës, Alban Hyseni, reagoi ndaj këtyre pretendimeve, duke thënë se raportimi është një obligim ligjor dhe opozita ka pasur qasje në materialet e nevojshme në kohë. Ai po ashtu shtoi se raportimi publik dhe ai në Kuvend janë dy procese të ndara, por të domosdoshme për performancën financiare të Komunës.

Ai tha se projekt propozimi i buxhetit është obligim ligjor që të shkojë për miratim në seancën e Kuvendit.

“Raportimi përmes dëgjimit publik me qytetarët dhe raportimi në Kuvendin Komunal, janë dy cështje të ndara, Është obligim imi me ligj që të raportojë edhe në dëgjim publik me qytetarët, e edhe në Kuvend, përndryshe penalizohemi nga grantet e performancës. Arsyetimi se keni qenë të përjashtuar nga dëgjimet buxhetore nuk qëndron sepse materialet dhe orarin e keni marrë me kohë. Raportet janë gjithmonë post-festum sepse nuk mund të raportojmë pa përfunduar 6-mujori”, ka thënë kryetari Hyseni.

Ndërkohë, në komunikatë tutje thuhet se Kuvendi ka shqyrtuar dhe rekomanduar për Kuvend raportin e auditimit për pasqyrat financiare vjetore të Komunës së Gjilanit për vitin 2024, vlerësimin e rreziqeve nga fatkeqësistë natyrore dhe fatkeqësitë tjera për komunën e Gjilanit, projekt-rregulloren për ndarjen e bursave dhe diskutimin rreth ngritjes së kujdesit institucional për grupet e margjinalizuara.

Ndërkaq, në këtë mbledhje, KPF nuk ka rekomanduar për Kuvend kërkesën e kryetarit të Komunës, Alban Hyseni, për themelimin e Inkubatorit të Biznesit në një hapësirë prej 15 hektarësh

Raporti i votimit pro (VV-PDK-AAK) dhe kundër (LDK-Vatra) ishte i barabart (4 – 4) dhe në këtë rast kryesuesi i Kuvendit, Kushtrim Kadriu, ka shfrytëzuar të drejtën e votimit të dyfishtë për të mos e rekomanduar për Kuvend këtë kërkesë me arsyesimin se Komuna ka Inkubator të Biznesit.

“Ta dini të gjithë që ju që keni votuar kundër se flitet për një hapësirë 15 hektarëshe e për fonde të cilat i kemi të garantuara. Komuna me këtë rast po humbë projekt i cili garanton zhillim të bizneseve, punësim e përgatitjen e të rinjve për tregun e punës. Ju po e pengoni të ardhmen e fëmijëve të kësaj komune”, ka nënvizuar Hyseni.

Ndërkohë, në mungesë të raporteve përmbledhëse, KPF ka shtyrë për një mbledhje tjetër Raportin e punës së Ndërmarrjeve Publike Lokale: “Stacioni i Autobusëve”, “Tregu” dhe “Ecohigjiena”,, sikurse edhe Raportin për përfundimin e gjysmë-vjetorit të dytë shkollor 2023-2024, ndërkaq për pikat tjera u tha se janë të panevojshme për të qenë pjesë e diskutimeve në Kuvend. KPF, në fund, nuk ka rekomanduar për Kuvend as kërkesën e VV-së për bartjen e 2.5 milionë eurove. /Telegrafi/