Botë Nga Bota Amerika

Obama dhe Pelosi të shqetësuar me shëndetin e Bidenit

Para 7 muajve

Barack Obama dhe Nancy Pelosi folën privatisht për Joe Bidenin dhe të ardhmen e fushatës presidenciale. As Obama dhe as Pelosi nuk janë plotësisht të sigurt se çfarë të bëjnë.

Demokratët janë duke u munduar t’i japin fund dobësimit të partisë, në mënyrë që të mund të fokusohen në parandalimin e fitores së ish-presidentit Donald Trumpit.

Dhe ata po i kërkojnë Obamës ose Pelosit që t’i ndihmojnë ta realizojnë atë, duke e ditur se udhëheqësi i shumicës në Senat, Chuck Schumer nuk ka besim te Biden dhe se udhëheqësi i pakicës në Dhomën e Përfaqësuesve, Hakeem Jeffries nuk ka një reputacion të fortë për të përcjellë mesazhin.

CNN foli me një duzinë kongresmenë, operativë dhe njerëz të shumtë në kontakt me Obamën dhe Pelosin, shumë prej të cilëve thonë se kandidatura e Bidenit ka përfunduar dhe në këtë pikë është vetëm një çështje se si do të zhvillohet, edhe pas konferencës për shtyp të enjten mbrëma, transmeton Telegrafi.

Dhe nëse të dy mendojnë ndryshe, thonë disa demokratë kryesorë, ata duhet ta bëjnë të qartë tani, përpara se të dëmtohet më shumë partia para zgjedhjeve që do të mbahen pas katër muajve. Shumë shpresojnë se Pelosi mund t’i japë fund trazirave që kanë kapluar demokratët gjatë dy javëve të fundit. Fundi mund të vijë, disa besojnë, nëse dhe kur Pelosi i thotë Bidenit se duhet të tërhiqet prej kandidimit.

Pelosi foli me Bidenin pas debatit televiziv, por ndërkohë ka bërë të qartë se nuk e konsideron vendimin e Bidenit për të vazhduar garën si përfundimtar. Ajo e ka refuzuar të komentojë më tej këtë çështje.

Vendimi i Obamës për të mos bërë asnjë koment gjatë dy javëve të kaluara bëri që shumë demokratë kryesorë të ndiheshin sikur ai i kishte lënë në baltë duke i qëndruar të njëjtit qëndrim që ka përcaktuar kryesisht periudhën e tij post-presidenciale.

Pas debatit, ai postoi në platformën X, “ndodhin netë të këqija debati. Më besoni, e di këtë”.

Ai përsëriti të njëjtën gjë në një tubim të demokratëve në New York, mbrëmjen pas performancës së Bidenit. Ish-presidenti as nuk kishte në plan të bënte ndonjë deklaratë publike, por ndihmësit e Bidenit dhe Obamës u koordinuan për të përcjellë përshtypjen se debati i parë i Obamës gjatë garës zgjedhore të 2012-ës gjithashtu shkoi keq, megjithatë nuk erdhi dorëheqja.

Por, skepticizmi në rritje i Obamës për aftësinë e mikut për të fituar zgjedhjet është një nga sekretet e mbajtura keq të Uashingtonit.

Kur të shkruhet historia e kësaj periudhe dy-javore të politikës amerikane, ndikimi i Obamës dhe Pelosit do të jetë shumë më i dukshëm sesa dihet, i thanë CNN-it njerëz të njohur me këtë çështje, pasi udhëheqësit demokratë shërbyen si udhërrëfyes për një parti në panik.

“Ata po shikojnë dhe presin që presidenti Biden të marrë vendimin e tij”, tha për CNN një demokrat prej kohësh i afërt me të gjithë ata, duke folur në kushte anonimiteti.

Duke mos kundërshtuar që ish-kryetarja e Dhomës dhe Obama folën për Biden, një zëdhënës i Pelosit i tha CNN pas publikimit të këtij artikulli se “nuk ka asnjë anëtar të Kongresit që ka njohuri për ndonjë bisedë midis Pelosit dhe Obamës. Kushdo që pretendon, nuk thotë të vërtetën”. /Telegrafi/