Nxënësit e Prizrenit marshojnë për ndërgjegjësim kundër bullizmit

Nxënësit dhe anëtarët e Asamblesë së Fëmijëve të Prizrenit, të mërkurën, kanë marshuar në qendër të qytetit me porositë kundër bullizmit. Sipas tyre bullizmi është i pranishëm në mjedise të ndryshme dhe ai duhet të luftohet përmes ndërgjegjësimit të shoqërisë.

Nxënësja Dorentina Ademqaj ka theksuar se rastet e bullizimit janë të pranishme në shkollat e Prizrenit dhe se ato kanë ndikim negativ tek fëmijët, raporton Telegrafi.

“Ka raste të bullizimit, dhe kjo nuk është gjë e mirë për fëmijët. Këtë fenomen duhet me ndalë, sepse nuk është gjë e mirë, dhe të gjithë nxënësit duhet të jemi shembuj të mirë për shoqërinë”, ka thënë ajo.

Jon Gërmizaj nga Asambleja e Fëmijë të Prizrenit ka theksuar se ndërgjegjësimi lidhur me këtë fenomen është i rëndësishëm, në këtë rast edhe përmes një marshi simbolik.

“Në vendin tonë ka raste të ndryshme të dhunës dhe bullizimit, që janë veprime të shëmtuara që bëhen kundrejt një nxënësi apo edhe kundrejt një arsimtari në anën e kundërt dhe ndërgjegjësimi për këtë është mjaft i rëndësishëm”, ka deklaruar ai.

Kryetari i Shoqatës Kosovare për Psikodiagnostikë dhe Psikoterapi, Latif Hoxha ka theksuar se ky marsh simbolik organizohet nga shoqata e sipërpërmendur në kuadër të projektit “Fuqizimi i të rinjve: Luftimi i bullizmit dhe ngritja e reziliencës”, në bashkëpunim me Aleancën Kundër Bullizmit.

“Kjo është një iniciativë e rëndësishme që synon të rrisë ndërgjegjësimin për bullizmin dhe të fuqizojë të rinjtë për të përballuar dhe parandaluar këtë fenomen”, ka thënë Hoxha.

Tutje ka sqaruar se bazuar në bashkëbisedimin me nxënësit gjatë ligjëratave ndërgjegjësuese, është vërejtur se bullizmi është mjaft prezent edhe në shkollat në Prizren, por se për këtë çështje do të publikohet edhe një hulumtim përkatës, raporton Telegrafi.

“Bullizmi një fenomen që prek të gjithë. Prandaj kemi organizuar marshin që ndërgjegjësimi të jetë më publik, meqë të qenit i bullizuar ka pasoja tjera në shëndetin emocional të fëmijëve”, është shprehur ai.

Marshi ka filluar nga Sheshi i Lidhjes dhe ka përfunduar në Sheshin Shadërvan, me ç’rast nxënësit e shkollave të mesme të ulëta kanë shpalosur mesazhet kundër bullizmit. /Telegrafi/