Numri i personave të vaksinuar kundër COVID-19 tejkalon 2 milionë në Turqi

Numri i personave në Turqi që kanë marrë dozën e tyre të parë të vaksinës kundër coronavirusit të ri (COVID-19) tejkaloi shifrën 2 milionë.

Sipas shifrave zyrtare, në fushatën e vaksinimit masiv në Turqi, nën të cilën profesionistët shëndetësorë po administrojnë injektimin e CoronaVac të blera nga kompania kineze SinoVac, përpjekjet për imunizim po zhvillohen normalisht.

Sipas të dhënave të Ministrisë turke të Shëndetësisë, mbi 2 milionë njerëz deri më tani janë vaksinuar, raporton Anadolu Agency.

Turqia më 14 janar filloi fushatën e saj masive të vaksinimit kundër COVID-19, duke filluar me punonjës të kujdesit shëndetësor së bashku me zyrtarë të lartë për të inkurajuar besimin e publikut mbi vaksinat, pastaj duke kaluar tek personat e moshuar.

Që nga muaji i kaluar Turqia po ashtu është duke zbatuar orë policore gjatë netëve dhe fundjavave për të frenuar përhapjen e virusit.

Sipas Universitetit “Johns Hopkins” në SHBA, që kur u shfaq në dhjetor të vitit 2019, pandemia ka marrë jetën e më shumë se 2.22 milionë personave në të gjithë botën.

Veç kësaj, në të gjithë botën janë raportuar më shumë se 102 milionë raste dhe mbi 57 milionë të shëruar.