“Nuk është Prishtina e Vokrrit, nuk duhet t’ia keni frikën”

Një vit më parë ishte kryetari më i ri në elitën e futbollit kosovar, derisa udhëhoqi Dritën me plot sukses.

Edhe pse tani është larguar nga klubi, Besim Ismaili vazhdon të përcjellë nga afër Dritën pasi ka dashuri të madhe për këtë klub.

Pasi kishte shkruar në ‘Twitter’, se Prishtina është thjeshtë Prishtinë e Superligës e jo ajo e Fadil Vokrrit, kontaktuam me të për ta pyetur rreth finales së Kupës së Kosovës.

“Në finale nuk do të luajmë me atë Prishtinën e Fadil Vokrrit, besoj që ju kujtohet ka qenë e forte dhe ka pasur shume tifoz?! Po e quaj të Fadil Vokrrit sepse deri në kohën e shpërbërjes të ish Jugosllavisë ekipet kanë pasur respekt dhe frikë nga Prishtina e njohur si e Vokrrit dhe e gjithë Shqiptarëve”, tha Ismaili, duke vazhduar se nuk duhet t’i kenë frikën Prishtinës.

“Tani Prishtina është vetëm një klub nga kryeqyteti që garon me vështirësi në elitën e futbollit të Kosovës dhe me një numër shumë të vogël të tifozëve dhe që nuk meriton ndonjë respekt të veçantë”.

“E kam një mesazh për lojtarët, pasi nuk dyshoj aspak në angazhimin, dashurinë dhe besnikërin e tyre ndaj klubit. Dua që ta mposhtin këtë Prishtinë të vetëquajtur si klubi më i madh në Kosovë, dhe që nuk po arrijnë së paku një herë ta mbushin atë stadium si në kohën e legjendës Fadil Vokrri”.

“Së bashku me tifozët më të mirë në botë ‘Intelektualët’, ju mund ta fitoni këtë trofe dhe ta sillni Kupën në qytetin tonë”, përfundoi Ismaili. /Telegrafi/