Ngjyra gështenjë është sinonim i ngrohtësisë, harmonisë dhe vetëbesimit, perfekte për vjeshtë, por e qëndrueshme gjatë gjithë vitit
Ngjyra gështenjë këtë vjeshtë zë vendin e parë në mesin e trendeve të grimit. E ngrohtë, elegante dhe shumëpërdorimshme, ajo përshtatet në mënyrë të përkryer si me kombinimet e përditshme, ashtu edhe me ato të mbrëmjes.
Zbuloni si ta përdorni në sy, buzë dhe faqe për një pamje natyrale, por njëkohësisht plot vetëbesim.
Një ngjyrë që nuk del kurrë nga moda
Ka ngjyra që kurrë nuk dalin vërtet nga moda kur flasim për grimin. Ngjyra gështenjë, një ton i ngrohtë, lehtësisht i kuqërremtë-kafe, është një prej tyre. Ajo është një nga ngjyrat më të përsosura të vjeshtës 2025.
Ndërsa nuancat beige dhe latte kanë dominuar vitet e fundit, gështenjta është si “motra” e tyre më e pjekur dhe më e sigurt në vete, pak më e errët, më e thellë dhe më rebeluese. Një ngjyrë që i shkon çdo lëkure dhe çdo stili, transmeton Telegrafi.
pexels
Si të përdorni ngjyrën më të bukur të vjeshtës
Trendi i grimit me ngjyrë gështenjë shfaqet më bukur mbi një bazë natyrale dhe pak me shkëlqim. Aplikoni hijen e syve në këtë ngjyrë në pjesën e jashtme dhe në përkuljen e qepallës me gisht, pastaj përziejeni butësisht drejt qendrës. Një ndriçim i lehtë në mes të kapakut do ta theksojë ngjyrën pa e ndryshuar tonin e saj.
Për një përfundim modern në buzë, përhapni butësisht buzëkuqin në ngjyrë gështenjë me gishtat dhe zbutni skajet për një efekt të butë e të natyrshëm.
Rregulli bazë është që ngjyra të ndërtohet gradualisht, në shtresa:
- te lëkurat shumë të çelëta, filloni me nuanca të lehta;
- ndërsa te tonet mesatare dhe të errëta, mund të përdorni ngjyra më të pasura dhe më pigmentuara.
Nëse nuk keni shumë kohë, zgjidhni një produkt multifunksional: aplikojeni në sy, faqe dhe buzë për një pamje monokromatike elegante, si ajo e pasarelave, vetëm për disa sekonda. /Telegrafi/
