Njohja e pensioneve Shqipëri-Kosovë, shumë shpejt pritet miratimi i marrëveshjes

Shqipëria dhe Kosova janë shumë pranë miratimit të marrëveshjes së njohjes së viteve të punës, duke bashkuar periudhat e kontributeve, për personat që punojnë në vendet respektive.

Marrëveshja mes dy vendeve është dërguar për miratim në Parlament, dhe synon që qytetarët e të dy vendeve të mund të marrin pensionin e pleqërisë që iu takon pavarësisht se sa vite kanë punuar në njërin shtet apo në tjetrin.

Në marrëveshje përcaktohet bashkimi i periudhave të sigurimit jo vetëm për pension pleqërie, por edhe për pension familjar apo invaliditeti, me kusht që ato të mos mbivendosen.

Marrëveshja parashikon rregullime të veçanta për trajtimin e personave të punësuar dhe të vetëpunësuar, të nëpunësve të shërbimit civil, anëtarëve të misioneve diplomatike dhe zyrave konsullore dhe punëtorëve të dërguar nga punëdhënësi për të punuar për llogari të tij në vendin tjetër.

Sipas ligjit “Për sigurimet shoqërore” përfitojnë nga skema e këtyre sigurimeve dhe kontributeve shqiptare, të gjithë ata persona që do të kenë mbi 15 vjet pune të siguruara. /TvKlan

Videon mund ta shikoni KËTU.