Një kohë të gjatë nuk do të ketë nevojë për pilot shkaku pandemisë, thotë akademia e trajnimit “Lufthansa”

Akademia për pilotë e Lufthansa-s këshilloi studentët të marrin në konsideratë profesionet e tjera sepse industria e aviacionit nuk do të ketë nevojë për ta për “një kohë shumë të gjatë”.

“Pothuajse të gjitha linjat ajrore nëpër botë nuk do të kenë nevojë për pilotë të rinj, qoftë me përvojë, qoftë pa përvojë, për një kohë të gjatë. Ka të bëjë me të qenit i drejtë dhe t’u shpjegojmë studentëve tanë se çfarë i pret në të ardhmen e afërt, se ata mund të fillojnë të mendojnë rreth karrierës alternative gjatë kësaj kohe”, raporton Flight Global.

Siç pohon edhe portali, një nga sindikatat e pilotëve gjermanë pretendon se shkolla “Lufthansa” trajnon një përqindje “shumë të vogël” të studentëve dhe se ata u “bëjnë presion” studentëve të tjerë që të mendojnë për një karrierë tjetër, transmeton Telegrafi.

Sindikata thotë se studentët që marrin pjesë në akademinë e “Lufthansës” pasi të kenë marrë licencën e saj speciale me shumë ekuipazhe, do të duhet të kalojnë në shkolla “të jashtme” të fluturimit dhe të pranojnë një ndryshim në programin e tyre, në vend të programit tradicional dhe universal të trajnimit të pilotëve të linjës ajrore.

Sindikata thotë se Lufthansa ka zgjedhur kandidatët “më të mirë” për programin e trajnimit pilot bazuar në markën e saj dhe perspektivat e punës në grup. Tani sindikata ka frikë se studentë të cilët përfundojnë trajnimin jashtë programit Lufthansa do të duhet të kalojnë një vlerësim përpara punësimit të mundshëm në të ardhmen dhe të mbajnë barrën e plotë financiare të trajnimit të tyre.

Aktivitetet në shkollat fluturuese, ndërkohë, janë në pritje të paktën deri në fund të vitit në mes të pandemisë COVID-19, sipas faqes së internetit të kompanisë.

Akademia tha se studentët e prekur nga shkurtimet kanë një ofertë të drejtë për të zgjidhur kontratat falas dhe se ata janë të lirë të vendosin nëse do ta pranojnë ofertën ose të shkojnë në trajnim të mëtejshëm.

Lufthansa deri më tani ka financuar shumicën e kostove të trajnimit të pilotëve të saj, të cilat do të shlyhen për disa vite punësim. /Telegrafi/