Një javë nga sulmi terrorist në Christchurch, Zelanda e Re mbanë heshtje për viktimat

Mijëra njerëz janë mbledhur në Hagley Park, pranë xhamisë Al-Noor, për të nderuar viktimat e sulmit terrorist që ndodhi një javë më parë.

Thirrja e namazit u transmetua në radio dhe televizione kombëtare në orën lokale të Zelandës së Re 13:30, dhe u pasua nga një heshtje dy minutëshe.

Prezent ishte edhe kryeministrja Jacinda Ardern, e cila të enjte njoftoi për ndalimin e të gjitha llojeve të armëve gjysmë automatike, shkruan BBC, transmeton Telegrafi.

Kurse, Imami Gamal Fouda i cili drejtoi lutjet, tha: “Ne jemi zemër thyer, por nuk jemi të mposhtur”.

Gamal Fouda ishte prezent kur ndodhi sulmi në xhaminë Al-Noor dhe tha se i armatosuri “theu zemrat e miliona njerëzve në mbarë botën”.

“Sot, nga i njëjti vend, unë shoh dashurinë dhe dhembshurinë. Jemi gjallë, jemi së bashku, të vendosur të mos lejojmë që dikush të na ndajë”, tha Fouda.

Javën e kaluar, australiani Brenton Tarrant gjatë kryerjes së sulmit terrorist la të vdekur pesëdhjetë persona dhe dhjetëra të tjerë u plagosën.

Tarrant është akuzuar për vrasje dhe pritet të përballet edhe me akuza të tjera. /Telegrafi/