Nis zbatimi i marrëveshjes me Italinë, 16 emigrantët e parë afganë mbërrijnë në portin e Shëngjinit

Mëngjesin e kësaj të mërkure, anija “Libra” ka mbërritur pranë brigjeve të portit të Shëngjinit me 16 emigrantët e parë afganë.

Anija është shoqëruar nga dy varka të tjera të policisë, dhe pritet të ankorohet në port që prej orës 07:30.

Në portin e Shëngjinit, forca të shumta të Policisë italiane dhe asaj shqiptare janë vendosur për të garantuar sigurinë gjatë këtij procesi.

Autoritetet po monitorojnë situatën për të siguruar një mbërritje të sigurt për emigrantët.

Refugjatët afganë që mbërritën me anijen “Libra” do të jenë të parët që fillojnë jetesën e tyre në kampin e krijuar sipas marrëveshjes së nënshkruar mes kryeministrit shqiptar Edi Rama dhe kryeministres italiane Giorgia Meloni.

Procedura e aplikimit për azil pritet të përfundojë brenda 4 javësh. Emigrantët që plotësojnë kriteret do të transferohen në Itali, ndërsa ata që nuk e kanë këtë të drejtë do të riatdhesohen pas qëndrimit në kamp.

Përshpejtimi i procesit për apelimet do të realizohet përmes lidhjeve me video me gjykatën e Romës, ku afati për shqyrtim është përgjysmuar në 7 ditë për shkak të dekretit të miratuar për fluksin e ri të refugjatëve.

16 emigrantët e parë udhëtuan me anijen e patrullimit 80 metra të gjatë, e cila ishte e shoqëruar nga një ekuipazh prej rreth 70 ushtarësh. /Telegrafi/