Ngritja e çmimit të çimentos, Hajdari premton mbështetje për sektorin e ndërtimtarisë

Ngritja e çmimit të çimentos dhe efekti i saj te bizneset e sektorit të prodhuesve të betonit e gjithashtu te ai i ndërtimtarisë, ishte tema kryesore e diskutimit në takimin e Dhomës së Tregtisë dhe Industrisë së Kosovës si dhe bizneseve anëtare me Ministren e Industrisë, Ndërmarrësisë dhe Tregtisë, Rozeta Hajdari.

Sipas njoftimit për media, ngritja e serishme të çmimit të çimentos për +17.81 cent (duke përfshirë TVSH-në) që ka hyrë në fuqi nga data 08.08.2022, apo 58.27 për qind brenda këtij viti, është ngritja e tretë e çmimit të çimentos në vitin 2022.

“Arsye kjo e cila bëri që të reagojnë përfaqësuesit e sektorit të prodhuesve të betonit në kuadër të Dhomës së Tregtisë dhe Industrisë. Dhoma e Tregtisë, vlerësoi që kjo është ngritja e tretë me radhë e çmimit që po bëhet brenda këtij viti, gjë e cila po paraqet një ngritje prej 58.27% krahasuar me atë të fillimit të këtij viti, prandaj kërkoi nga Ministria e Industrisë, Ndërmarrësisë e Tregtisë që të ndërmerren masa të menjëhershme për tejkalimin e kësaj situate të krijuar, ashtu që të mos ketë pasoja negative tek bizneset dhe ekonomia vendore”, thuhet në komunikatën për media.

Sipas përfaqësuesve të bizneseve, ngritja e shpeshtë e çmimit me paralajmërime në afate tejet të shkurtra kohore, e mungesa e arsyetimit përmbajtjesor për këto ngritje, po shkakton shumë sfida në operimin e bizneseve të sektorit të prodhuesve të betonit si dhe në përmbushjen e kontratave që këta të fundit kanë me klientët e bashkëpunëtorët.

“Gjithashtu kjo po ndikon edhe në humbje të mëdha që po u shkaktohen këtyre bizneseve dhe si rrjedhojë ndikon edhe largimin e punëtorëve. Nga njoftimet e pranuara nga bizneset për ndryshim të çmimit nga ana e kompanisë Sharr-Cem, konsiderohet që faktor të jetë rritja e çmimit të energjisë elektrike, e cila nga ana e prodhuesve të betonit gjithashtu konsiderohet si argument i pamjaftueshëm dhe i papranueshëm për një rritje kaq të madhe”.

“Ministrja Hajdari falënderoi për takimin dhe shprehu gatishmëri për trajtimin e rastit. Gjithashtu theksoi që ky takim ishte më se i nevojshëm në mënyrë që të marrë informata më konkrete për këtë problematikë me të cilën bizneset po ballafaqohen, duke shtuar që do ta trajtojë dhe do të bëjë përpjekje që t’i dal në ndihmë këtij sektori”. /Telegrafi/